Shillong, Jylliew 05:
U Myntri Sorkar Jylla u Bah Paul Lyngdoh uba dei ruh u MLA ka UDP na West Shillong u la ther ïa ka Voice of the People Party (VPP) haba kynnoh ba ym tang ba ka la shim kabu saiñ hima, hynrei ban pynshit, isih bad ïa ka jingsngew ïapher jaidbynriew bad ruh ban pynkhihwin ïa ka imlang sahlang halor ka Reservation Policy bad Roster System.
Haba kren sha ki lad pathai khubor ha ka sngi Nyngkong, u Bah Paul u la ong, ba ka Reservation Policy kam dei satia ka mat kaba hakhmat eh kaba ktah ïa ka jaidbynriew Khasi mynta.
“Ngam ong ba ka (Reservation Policy) kam dei kaba donkam. Kaei kaba nga ong, ka long ba phi donkam ban buh ïa kino kiba kham kongsan hakhmat. Kam dei satia ka mat ba kongsan eh ba ngi mad (kum ki paid riewlum). Ngi la kdew ruh ha ka mat treikam (manifesto) ka seng,” la ong u Bah Paul.
Haba pynpaw ba ka Sorkar MDA ka la dep thaw ïa ka Expert Committee ban shong bishar ïa ka Reservation Policy, u Myntri u la ong, “Ka jingïalang ki seng saiñ pyrthei ka dei ka kam kaba bteng bad ngin sa wanrah ïa ka lynti kaba biang eh ban pynbeit”.
“Hynrei haba phi khmih ïa ka na kiba bun ki liang, ka jingbym ïoh kam ïoh jam ka dei ka mat kaba kongsan eh ha Meghalaya bad kam dei satia tang ka jingbym ïoh kam ïoh jam, hynrei ka don ruh ka mat ba ngim lah ban ïoh kam (unemployment) namar ba ngim biang ban trei ha kine ki kam,” la ong u Bah Paul.
U Bah Paul u la ong ba dei ban kylli balei ha ka eksam ka UPSC, ka Mizoram ka ïoh 4 katba ka Meghalaya ka ïoh tang uwei kata ruh ki briew na kiwei pat ki jaidbynriew haba ban jur “La ngin sei ïa ki briew ki ban kiew sha ki kyrdan ba hakhlieh duh jong ka bor treikam lane ngi kwah pynmih tang ki peon bad chowkidar. Kane ka shong ha phi”.
Shuh shuh u Bah Paul u la ban jur ba ka jingbishar thymmai ïa ka State Reservation Policy kan nym ïarap satia ha ka ban weng ïa ka jingeh ha ka jingbym ïoh kam ïoh jam bad ong “Da lei lei ruh em. Ki don haduh 500 tylli ki kam kiba lait hapoh ka Sorkar bad ki PSU ha ka shisnem bad kine ki dei ki tnat ba dang ring sdot ha ka ïoh kam ïoh jam”.
“Ki don palat ar lak tam ki samla kiba la pynrung kyrteng ïalade ha ka ophis jong ka Employment Exchange bad kumta kan shim por da ki spah bad hajar snem ba kine baroh kin ïoh kam sorkar. Ka pyrthei ka la ïaid shakhmat bad pyrkhat thymmai, hynrei ngi hangne dang ïakhih bad ïakren halor ka bhah thung kam kum ka mat ba kongsan tam ka jaidbynriew. Kaei ka thong ka jong ngi? Ngi la don ki Khasi jong ngi kiba la shakri kum ki heh ophisar kum u Chief Election Commissioner jong ka India, Ambassadors jong ka Ri India sha kiwei pat ki Ri bad ruh ki nuclear scientist kiba trei ha ki Ri ka dewbah Europe. Kumno ngin ai mynsiem ïa ki samla jong ngi? La buh jingkylli u Bah Paul.
Haba pynpaw ba ka jylla ka don ïa ki samla kiba don sap, u Bah Paul u la ong, “Ki briew jong ngi ki don ïa ka sap bad ka jinglah, hynrei ki don pat katto katne kiba kwah ban tan ïa ki paidbah bad pynrung ha ka jingsngew ka jong ki ba kane ka mat bhah thung kam thung jam ka dei ka kam ïap kam im ka jaidbynriew. Ngi donkam ban ïoh shakhmat ne ïohi jngai namar ka Ri ka bym don ki nongïalam kiba ïohi jngai kan sa jah noh.”
Haba pynpaw ba ka jingpynman kongsan ïa ki kam hangne ka long kaba bakla bha, u Bah Paul u la ong, ba ka mat kaba ktah bha ïa ka imlang sahlang ka dei ka jingngop ha ki jingdih drok, ka jingbun ki kmie khlem lok, ka jingduna ki khynnah ban ïoh jingbam tei met, ka jingïap ki khunlung ba dang lah bad ka jingbym don jaka puta.
“Kine ki dei ki mat kiba ktah ïa ngi hynrei kim khring ïa ki paidbah namar kim don satia ïa ki nongkynshoit ban don ka mynsiem ïashun bad kawei ba kim dei ki ’riew saiñ pyrthei bad dei na kata ka daw kim paw satia kum ki mat” u la bynrap.
Une u nongïalam ka UDP u la kynnoh ba ka VPP ym tang ba ka leh politics ïa ka mat jong ka Reservation Policy, hynrei ka la ber bih ban ïashun jaidbynriew bad ruh ban pynlamwir ïa ka imlang sahlang.
Haba ñiew ïa ka jingïakhih ka VPP kum ka jingleh politics, u la ong “Phim dei ban sngew lyngngoh haba ki seng saiñ pyrthei ki leh politics hynrei u dei ban don da u pud. Ngi hap ban batai ïa uta u pud. Ngim lah ban shu pynbiej ne lehkai bad ka jingsngew jong u paidbah”.
Haba ther pyrshah ïa ka VPP, u Bah Paul u la ong ba ka daw ba balei u la shah peit khmat bad ka jingkylli ba u sngap jar ka dei namar jong ka jinglong ka jaka.
“Ka thaiñ Motphran ka la ju dei ka jaka pdeng jong ki jingïakhih baroh. Ki lai tylli ki konstitwensi kiba don jingïadei bad kane ka thaiñ ki dei ka Mawkhar-Jaïaw (North Shillong), Mawpren (West Shillong) bad Mawlai. Ka VPP ka la jop ha Mawkhar-Jaïaw bad Mawlai hynrei ym ha Mawprem. Balei? Namar kam long kaba suk ban kren jaidbynriew na Mawprem kumba kren bad kyrhuh ha Nongkrem. Ha Nongkrem, lait noh ka Madanriting, phi lah ban kren bad kyrhuh katba mon namar ki nongshong shnong ki dei beit ki Khasi ym kum ha Mawprem kaba ïashong khleh jaidbynriew,” u la ong.
Shuh shuh u la buh jingkylli ïa ka jingthmu jong u kyrtong ka VPP dang shen ban rah placard hakhmat ka ïingsah jong u. “Dang ha u bnai Lber haba la pynbna ïa ka risol jong ka ilekshon, u kyrtong ka VPP u la wan ba saw hadien jong ka NPP bad BJP. Kane ka konstitwensi ka la jied ïa u Bah Paul Lyngdoh, kumta dei ban pdiang ïa ka rai jong u paidbah,” u la ong.
