Shillong, Jylliew 06:
U Myntri Rangbah ka Jylla, Conrad K Sangma, u la pyntip ba namar ka jingbym ïoh ne hap jong u slap, ka pung Umïam kaba bsa bording ka la don ha ka tmier ban shah khang noh. Lada ka jinglong jingman ka neh sah kumne, ki bnai ban wan kin sa long kiba jynjar bha.
U Myntri Rangbah u la pyntip ïa kane ha ka jingïakynduh bad ki lad pathai khubor ha ka Sngi Ba-ar haba la don ka jingkylli halor ka jinglong jingman ka mat bording bad kiei ki lad ki lynti ba ka sorkar ka la shim ban weng ïa kane ka jingeh.
“Ka pung Umïam ka la don ha tmier jong ka jingshah khang. Ngim pat shym la ïoh ïa ka jingdap ka um ha u pud ba ka dei ban don namar ka jingbym ïoh slap shuh ha kine ki bnai bad ba ka jylla mynta ka la don ha ka lynti jong ka jingeh, lada kane ka jinglong jingman kan dang ïai bteng,” la ong u Conrad.
Nangta haba kylli halor ka jingnang sniew jong ka jinglong jingman ka bording hapoh ka jylla, u Myntri Rangbah u la ong ba kane kam dei tang ha Meghalaya, hynrei wat ha kiwei ki jylla jong ka Ri ruh ki mad ïa kum kane kajuh ka jingeh ba ka Meghalaya ka mad mynta.
Ha kawei pat ka liang haba pynpaw ba ka sorkar ruh ka dap da ka jingsngewkhia halor ka jinglong jingman ka bording hapoh ka jylla, u Myntri Rangbah u la kyntait ruh ïa ki jingkynnoh pyrshah ïa u, ba u la pyndam noh ïa kiba bun ki projek bording kiba kongsan hapoh ka jylla, kata ha u snem 2008-2009 ba u la bat kum u Myntri ka tnat Bording ka jylla.
“Ki la don bun ki projek ïa kiba la soi ha kato ka por, hynrei kam shym la dei satia pat kaba ngi la shu pyndam noh. La thung ïa ka jingtohkit halor ki kyndon pyntreikam bad ki la don ruh ki jingbym biang ha ka rukom pynïaid kam kiba la don, kiba la lah ban buh ha ka jingeh ba khraw ïa ka jylla. Kumta, haba ngi sngewkhia halor ka jinglong jingman ka bording, la dei ban bud ryntih ïa ka rukom pynïaid kam, ïa kaba khlem leh satia,” u la ong.
Shuh shuh u la ong ba kan nym long kaba dei ban shu ïakynnoh ne kdew kti uwei ïa uwei bad ka kam kaba kongsan ka long ban ïaid shakhmat bad wad lynti kumno ban weng ïa kane ka jingeh.
