Shillong, Jylliew:
Kum shi bynta ka jingrakhe ïa ka ‘World Environment Day’, ki samla pule ka Indian Institute of Professional Studies (IIPS) jong ka tnad pule Social Work ha ryngkat ka jingïatreilang bad ka Shillong Municipal Board (SMB) bad ka Nomads Adventure ha ka Lah Sngi U Blei ki la pynlong ïa ka jingpynkhuid ïa ka sor Shillong.
Ha katei ka sngi ki samla ha ryngkat bad ki nonghikai jong katei ka jaka pule ki la mih shakhmat ban pynkhuid ïa ka sor ha kaba ka phang jong ka ‘World Environment Day’ mynta u snem ka long “To Beat Plastic Waste Pollution” bad ki la sdang ïa katei ka jingpynkhuid na Dhankheti sha Barik, U Soso Tham Auditorium, Kashari bad ki la pynkut ha Khyndailad.
Haba kren sha ki lad pathai halor ka jingpynkhuid ïa ki ñiut kiba la ïoh lyngba kitei ki lynti, na ka liang ka nonghikai katei ka jaka pule, ka Kong Wanphylla Nongrum, ka la ïathuh ba ka Shillong Municipal Board kan sa shimkhia ban leit bret ïa kitei ñiut kiba la dep ban tam da ki khynnah bad kiba la lum shi lynnong ha kawei ka jaka.
“Nga kyrmen ba ym dei tang ha kane ka kynti ba tang namar ba ka dei ka ‘World Environment Day’, ngin pynkhuid ïa ka mariang bad ka sawdong jong ngi hynrei nga kyrmen ruh ba man ka sngi, ngin leh khyndiat eh na ka liang ka jong ngi ba ngin ym bret ïa ki jaboh ki jabaiñ na ki ïing ki sem ki jong ngi lane ha ka por ba ngi ïaid ha ki lynti ki syngkien hynrei ba ngin thep ha ki pla jong ngi khnang ba ka mariang ka jong ngi kan long kaba itynnad,” la ong katei ka nonghikai. Katei ka nonghikai ka la ong ruh ba dei ban long ki briew kiba don ïa ka jingkitkhlieh ym tang na ka bynta ka kam ka jam lajong lane tang ïa ka jingpule hynrei ban don ka jingkitkhlieh ruh na ka bynta ka mariang kaba ngi im bad ngi sah.
