Shillong, Jylliew:
Man la u snem la ju rakhe ïa ka 5 tarik Jylliew kum ka sngi pynneh pynsah mariang, bad ha kum kane ka sngi, la ju thung ruh da ki hajar tylli ki tynrai dieng ha kylleng ki jaka jong ka Jylla.
Katkum ka jinglum jingtip halor ka jingthung ïa ki tynrai dieng man la u snem, la ïathuh ba ki tnat treikam ka Sorkar naduh ka tnat Forest and Environment bad ka tnat Soil and Water Conservation, ki tynrai dieng kiba ju thung ki long da ki hajar tylli.
Kine ki tynrai dieng ki kynthup lang ïa ki jait dieng bapher bapher naduh ki dieng met bad dieng kseh, nalor ki tynrai dieng soh bad dieng syntiew kiba heh.
La ïathuh ba ki kynja kynhun ne ki riewshimet kiba thung ïa ki tynrai dieng ki shu kut tang ha kaba thung, hynrei kim don pat ka jingbuddien la kito ki tynrai dieng ki im bad ki heh ki san ne em.
“Lada dei ba ki tynrai dieng kiba la thung baroh shi katta snem ki im bad ki heh ki san, ka mei mariang ka la dei ban jyrngam,” la ong uwei na ki ophisar.
Ki la ong ba ka jingthung dieng ka dei ban long katkum ka aïom bad ki jait dieng kiba kumno kiba lah ban heh ban san, bad ka khyndew ka dei ban long kaba kumno.
Bunsien ka Sorkar Jylla bad ki seng bapher bapher ki ju pynlong ïa ka jingthung tynrai dieng kum ka dak ban rakhe ïa ka sngi pynneh pynsah mariang man u snem ha ka 5 tarik Jylliew ha shityllup ka pyrthei. Kane ka jingrakhe ka la sdang naduh u snem 1973 lyngba ka jingmaitphang ka United Nations khnang ban ïada ïa ka mariang.
