Shillong, Jylliew:
Ka Hynñiewtrep Youth’s Council (HYC) Education Cell ha ka sngi Nyngkong ka la leit buh da ka jingthoh sha u Myntri Rangbah ka Jylla bad ruh ha u Myntri ka tnat Pule Puthi ban dawa buh kham bun ki Common University Entrance Test (CUET) Centre ha ka Jylla Meghalaya. Ha ka kyrwoh khubor ba la pyllait da u Education Secretary ka HYC u Bah Enlang Sawian u la ong, ka Education Cell ka la pyntip ba ki samla pule ki mad jingeh shi katdei eh namar ki hap leit thoh ïa ka eksamin CUET sha Assam bad kiwei ki Jylla na bynta ban ïoh leit pule sha ki kyrdan pule UG bad PG. U la ong, kane ka la pynlut ksan ïa ki samla pule bad ruh ka la buh jingeh ha ka leit ka wan sha jngai la ka Jylla. Ka seng ka khmih lynti ba ka sorkar kan shimkhia ban weng ïa kane ka jingeh ki samla pule.
