Shillong, Jylliew:
Ka Bharatiya Janata Party (BJP) ka la ong ba ka seng ka ieh ha ka jingstad jong ka komiti ki ‘riewshemphang ne ka ‘Expert Committee’ ban ïakren halor ka bhah thung kam ne ka ‘Reservation Policy’.
Ïa kane la ong da u State President ka BJP, Bah Ernest Mawrie haba kren sha ki lad pathai khubor ha ka Lah Sngi U Blei.
“Ka BJP ka la ïashim bynta ha ka jingïalang jong baroh ki seng saiñ pyrthei ba la khot da u Myntri Rangbah ka Jylla bad mynjur ruh na bynta ka komiti ba kyrpang ha kaba la don ruh uba mihkhmat na ka liang ka seng. Mynta ka dei ka kamram jong ka komiti ban ïakren halor kiba bun ki bynta bad ban ai jingmut sha u Myntri Rangbah,” la ong u Bah Mawrie.
Haba pynsngew ba na ka liang ka seng ka la thaw ïa ka komiti (ba kynthup ïa u), u la ong ba ka komiti kan sa ai jingmut sha ka Sorkar haba ïadei bad katei ka bynta. Haba kylli, u la ong, “Ngi la dep ban thaw ïa ka komiti bad ka la dep aiti sha nga ruh bad ngin nang pynbha shuh-shuh namarba ka Sorkar ka dang ai por ïa ngi.”
Shuh shuh u la bynrap ba kum ka komiti kan dang shong ïa ki jingïalang khnang ban leh ïa kaba bha tam na bynta ka Jylla khlem da noh shiliang khmat ïano-ïano.
