Shillong, Jylliew 06:
Ka Kynhun Myntri jong ka Sorkar Jylla ka la rai ban bteng noh biang ïa ka jingkhot pynrung kam ha ki tnat treikam bapher bapher hadien ba la dep mynjur ban pynkylla ïa ka Office Memorandum (OM) haba ïadei bad ka rukom pyntreikam ïa ka Roster System kaba la bthah da ka Ïingbishar Meghalaya High Court.
Haba pynbna ïa kane sha ki lad pathai khubor hadien ka jingïalang jong ka Kynhun Myntri mynta ka sngi ba-ar, na ka liang u Myntri Rangbah, u Conrad K Sangma u la ïathuh ba ïa ka Office Memorandum (OM) la pynkylla da kaba shimlang ruh ïa ka jingai jingmut kaba mih na ka jingïalang jong baroh ki seng saiñ pyrthei (all party meeting) kaba la long dang shen halor ka Roster System.
U Myntri Rangbah u la ïathuh ba hadien ba la pynmih ïa ka OM kaba la dep ban pynkylla haba ïadei bad ka Roster, ka jingkhot ban pynrung kam ha ki tnat treikam bapher bapher ruh kan bteng biang.
Haba kylli halor ka jingong ban pynsangeh shwa ïa ka jingkhot pynrung kam katba ym pat dep khmih bniah ïa ka Reservation Policy, u Myntri Rangbah u la ong ba ka jingpynrung kam ka dei ban bteng namar ki don bun ki samla kiba wad kam Sorkar kiba la nang ïaid ka rta bad ka long ka jingduhlad ïa kiba wad kam Sorkar lada sangeh ka jingthungkam.
Ha kawei pat ka liang, ka Kynhun Myntri ka Sorkar Jylla ka la mynjur ban don da ka Search Committee na ka bynta ban wad ïa ki riewshemphang kiba dei ban ïadonbynta ban ïathir ïatai halor ka jingkhmih bniah ïa ka bhah thungkam jong ka Jylla lane ka State Reservation Policy.
U Myntri Rangbah Conrad K Sangma u la ïathuh ïa kane hadien ka jingïalang jong ka Kynhun Myntri.
Nalor kane, u la ong ba ka Search Committee ka kynthup ïa lai ngut ki dkhot ba lamkhmat da u Chief Secretary, nalor u ophisar ka tnat Aiñ bad ka tnat Personnel.
Dang shen, ka Sorkar Jylla ka la mynjur ban thaw da ka Expert Committee na ka bynta ban khmih bniah ïa ka Reservation Policy.
U Myntri Rangbah u la ong ba ka Expert Committee ka dei ban don 5 ngut ki dkhot kiba dei ki riewshemphang, bad na ka liang ka Search Committee kan sa wad ïa kita ki briew kiba don jingtip bad shemphang ha ki bynta bapher bapher ban buh ïa ki kum ki dkhot ka Expert Committee.
