Shillong, Jylliew 06:
Ka jingai jingkyrshan ki paidbah ïa ka seng Voice of the People Party (VPP) khamtam halor ka jingïakhih shah thngan jong u Bah Ardent Basaïawmoit ban dawa khmih bniah biang ïa ka bhah thungkam thungjam hapoh ka jylla ka lah ban pynlong ïa ki katto katne ngut ki nongkitkam ka Hills State People Democratic Party (HSPDP) ba ki lah ban mih noh na ka seng bad ban leit pynïasoh noh sha ka seng VPP.
Katkum ki khubor ba la ïoh lum la ïathuh ba katto-katne ki nongkitkam ka HSPDP kin sa mih noh ha kine ki khyndiat sngi ban rung dkhot pura noh sha ka seng VPP.
Nangta ki khubor ki ïathuh ruh ba kane ka jingthmu ban mih noh na ka HSPDP ka dei ba ka la don ka jingbym ïasngewthuh jingmut haba ïadei bad ka mat kaba ki paidbah ki la ai jingkyrshan ïa ka VPP ban pynkylla ïa ka bhah thungkam, hynrei ha kane ka seng ka la don ka jingïatai kaba jur bha.
Nalor kata, ki la ïathuh ruh ba ym tang ïa kane ka kam ba ïakhih ka VPP ba ki nongkitkam ki la ïakren, hynrei ki don pat sa kiwei ruh ki kam ba ka don ka jingbym ïasngewthuh jingmut.
Kat haduh mynta ïa kine ki nongkitkam ka HSPDP ki ban mih noh na ka seng dang buhrieh ïa ki kyrteng, hynrei kin sa pynpaw hi ynda ki la leit rung sha ka VPP.
Kum ban shu pynkynmaw ki la don ki nongkitkam ka HSPDP kiba la leit ban ai mynsiem ïa u Bah Ardent Basaïawmoit haba u pynlong ïa ka jingïakhih da kaba shong shah thngan kaba khlem buh por ha Additional Secretariat.
Ka HSPDP ha kane ka ilekshon MLA kaba dang shu dep ka la jop ar ngut ki MLA bad mynta ka ïatreilang bad ka NPP, UDP, BJP ha ka sorkar MDA-2, bad uwei na kine ar ngut ki MLA, kata u Bah Shakliar Warjri u bat kum u Myntri ha ka Sorkar Jylla.
