Shillong, Jylliew 06:
Ka Kynhun Myntri ka Sorkar Jylla ka la ai jingmynjur ban thaw noh la kajong ïa ka Directorate of Forensic Science Laboratory hapoh ka Jylla da kaba pynïakhlad noh na ka tnat Home (Police) kaba la ju hap lang hajuh baroh shi katta.
Hadien ka jingïalang jong ka Kynhun Myntri, u Myntri Rangbah, Conrad K Sangma u la pynbna ïa kane ka rai ha kaba yn thaw ïa ka Directorate of Forensic Science Laboratory khnang ban nang pynkhlaiñ ïa ka jingtreikam jong kane ka tnat kaba ju ïarap bha ban lap ïa ki sabut haba tohkit ïa kino-kino ki jingjia.
U Myntri Rangbah u la ïathuh ba kat kum ka jingbthah ka Human Rights Commission, ka Jylla ka donkam ban pynkha la kajong ka Directorate jong ka Forensic Science Laboratory khnang ba kan treikam laitluid.
Nalor kata, u la ong ba ki briew kiba trei hapoh kane ka tnat bad ki jingdonkam baroh ki la don lypa. Hynrei kaba donkam ka long satang ban nang pynkhlaiñ shuh shuh ïa kane ka tnat da kaba wanrah shuh ki tiar ki tar kiba donkam, bad ban mang pisa shuh ban pynbiang ïa ki jingdonkam hapoh kane ka Directorate.
