Shillong, Jylliew 06:
U Myntri Rangbah ka jylla, Conrad K Sangma, u la pyntip ba ka jingïakren ïasuk hapdeng ka ka Sorkar Jylla, ka Sorkar Pdeng bad ka kynhun kieng atiar Hynñiewtrep National Liberation Council (HNLC) kaba la dei ban long ha ka taïew ba nyngkong mynta u bnai, ka la sahkut noh shwa kumto namar ka jingmih ka jingïakynad ki ar jaidbynriew ha jylla Manipur.
“Kumba baroh ngi ïa tip ba ka Ministry of Home Affairs (MHA) ka dang bunkam bha bad ki tnat bapher bapher jong ka jylla Manipur. Kumta ki kam ki jam ki la kylla noh namar ka jingmih ka kynrum-kynram,” la ong u Conrad haba kren sha ki lad pathai khubor ha ka sngi Ba-ar.
U la ong, ba ka Ministry of Home Affairs (MHA) ka don ïa ka jingsngewkhia ha kaba ïadei bad ka jingïakren ïasuk bad ka sorkar jylla ka la ïoh ban ïakren bad ka sorkar pdeng bad la pynthikna ba ka jingïakren ïasuk kan sdang noh bad yn sa pynïaid noh shakhmat ïa kane ka kam.
Katba na ka liang ka HNLC ka la ban jur ïa ka jingdonkam ban map (amnesty) ban pynïaid shakhmat ïa ka jingïakren ïasuk. Nangta ki la pynpaw ba ka jingïakren ïasuk kan ym lah ban ïaid shakhmat lada ka sorkar jylla bad ka sorkar pdeng kim pdiang ïa ka jingdawa ka Council ban map noh ïa ki.
