Shillong, Jylliew 06:
Ka North Eastern Hill University (NEHU) ka la wan ha ka kyrdan ba 80 napdeng ki 100 tylli ki skulbah ha ka thup National Institutional Ranking Framework (NIRF) 2023 jong ka tnat pule puthi ka Sorkar Pdeng.
Ïa kane ka thup la pyllait paidbah ha ka Sngi Ba-Ar. Ha u snem ba la dep, ka NEHU ka la poi ha ka kyrdan ba 66. Katba mynta u snem ka la nang hiar arsut ha kaba ka la poi ha ka kyrdan ba 80 da kaba ïoh ïa ka ‘score’ kaba 44.95. Ha u snem 2021, ka NEHU ka la ïoh ïa ka kyrdan ba 59.
Hynrei, ka NEHU ka khlem pat paw kyrteng satia napdeng ki 100 tylli ki shlem ai jinghikai kiba kynsai ha ka Ri baroh kawei lane ha ka thup kaba ki khot ka ‘Overall Ranking’.
Napdeng ki skulbah bakynsai tam ha ka Ri, kaba wan nyngkong ka dei ka Indian Institute of Science, ba-ar ka dei ka Jawaharlal Nehru University bad ba lai ka dei ka Jamia Millia Islamia.
Kiwei pat ki skulbah kiba kham paw shakhmat ki long ka Jadavpur University, Banaras Hindu University, Manipal Academy of Higher Education-Manipal, Amrita Vishwa Vidyapeetham, Vellore Institute of Technology, Aligarh Muslim University bad ka University of Hyderabad.
Ka NIRF ka la shem ba ka shlem ai jinghikai kaba kynsai tam ha ka Ri baroh kawei ka dei ka Indian Institute of Technology Madras bad bud sa ka Indian Institute of Science, Indian Institute of Technology Delhi, Indian Institute of Technology Bombay, Indian Institute of Technology Kanpur, All India Institute of Medical Sciences, Delhi, Indian Institute of Technology Kharagpur, Indian Institute of Technology Roorkee, Indian Institute of Technology Guwahati, Jawaharlal Nehru University, bad kiwei.
Ha kane ka thup (Overall Ranking), wat ka IIM Shillong ruh ka khlem paw kyrteng satia, hynrei napdeng ki skul ai jinghikai ha ka ‘Management’, ka IIM Shillong ka la wan ha ka kyrdan ba 26 napdeng 100 tylli.
