Shillong, Jylliew:
Ka shlem trei kam Krishi Vigyan Kendra (KVK) East Khasi Hills kaba don hapoh ka tnat Agriculture and Farmers Welfare, Meghalaya ka la rakhe ïa ka “World Environment Day 2023” ha ka 5 tarik u Jylliew halor ka phang “Ki lad ban pynduna na ka jingpyndonkam ïa ki Plastik” ha KVK East Khasi Hills, Upper Shillong.
Kum shi bynta ban rakhe ïa kane ka sngi, la pynlong ïa ka ‘Inter School Quiz’ bad ‘Drawing Competition’ na ka bynta ki skul ba hap hapoh Upper Shillong. Ka thong jong kane ka sngi ka long ban pynsngewthuh sha ki khynnah skul ïa ka jingdonkam ban sumar ïa ka mariang lyngba ka jingpynduna ïa ka jingpyndonkam ïa ki plastik. Ka Springtime Secondary School Sadew ka la long ka lahduh ha baroh ar tylli ki jingïakob bad bud pat da ka skul Kendriya Vidyalaya, EAC, Upper Shillong, Sanshnong UP School bad Sanmer Secondary School. Ha kane ka sngi la ïoh ruh ban thung ïa ki dieng ha ka phyllaw jong ka shlem trei kam ïa kaba la ioh na ka ophis u Range Forest Officer, Sanmer.
U kongsan jong kane ka prokram u Bah. D. Lamar, Director of Agriculture (R&T), Meghalaya haba ia jingkren kum u kongsan u la ban halor ka jingdonkam ban pynneh ïa ki jingtip long tynrai khamtam ha kaba ïadei bad ka jingpynnneh ïa ka mariang bad ka mei ramew. U la batai ruh shaphang ki lad ki lynti kumno ban bud ïa ka rukom im man ka sngi da kaba pynduna ïa ka jingpyndonkam ïa ki mar plastik ha kano kano ka liang namar ka jingpyndonkam ïa ki ka la long ki jingtim lane ka jingduhnong ïa u bynriew. U la pynshlur ruh ïa ki khynnah skul ban thung ïa ki dieng ha kylleng sawdong khnang ban ïada ïa ki tyllong um bad kumjuh ruh ban ïada na ka jingkylla ka mariang.
U Bah Victor. L. Khonglah, Senior Scientist and Head ha kaba pdiang sngewbha ïa ki nongiashim bynta u la kitbok ïa ki ban leh la ka bynta ha kaba sumar ïa ka mariang.
