Shillong Jylliew 06:
U Myntri ka Sorkar Jylla, Bah A.L Hek u la leit ban ïashimbynta ha ka sngi rakhe pynneh pynsah ïa ka mariang ha ki ar tylli ki jaka ha kaba u la ïasnoh kti lang ban thung ïa ki tynrai dieng kum ka dak jong ka jingrakhe.
U Bah Hek u la ïashimbynta nyngkong ha Umtrew ha Ri Bhoi district ha ka jingrakhe kaba la pynlong da ka LiFE Lifestyle for Environment ha ryngkat ki samla pule ka St. Joseph Nursing Academy lem bad ki nonghikai ha ka jingdonlang u Rangbah Shnong ka Umtrew bad ka ophisar na ka tnat Fisheries ba kiwei kiwei.
U Bah Hek haba ai jingkren ha katei ka sngi u la khot la wer ïa ki nongshong shnong ka Jylla ban sdang shwa ka jingsngewthuh nalade kumno ban sumar ïa ki sawdong sawkun bad kumno ban pynneh pynsah ïa ka mei mariang.
Hadien kata, ki khynnah pule ka St Joseph Nursing Academy ki la thung dieng ruh ha ka bynta kaba hapdeng jong ka surokbah Shillong-Guwahati hadien ba pan jingbit na ka NHAI.
Ha kawei pat ka jingrakhe, u Bah Hek u la leit ban ïashimbynta ha ka jingthung dieng kaba la pynlong da ka Khliehumlang Bio-diversity Park Sohbar kaba hap ha Sohbar Sirdarship.
Ha kane ka jingrakhe ha Sohbar, la donlang u Myntri Sorkar, Bah Paul Lyngdoh nalor u MLA ka Shella, Bah Balajied Synrem, u CEM ka KHADC, Bah Titosstarwell Chyne bad kiwei kiwei ki ophisar ka Sorkar Jylla.
Ha kane ka sngi, u Bah Paul u la plie paidbah ruh ïa ka Khliehumlang Bio-diversity Park ha Sohbar bad bud sa ka jingthung ïa ki tynrai dieng.
