Shillong, Jylliew 06:
U Myntri Rangbah ka Jylla, Conrad K Sangma, u la pyntip ba ka Sorkar ka la pynlut haduh kumba T.600 klur na ka pla tyngka jong ka jylla ha ka shi snem na ka bynta ka jingthied ïa ka bording bad kiwei ki jingsiew kiba don ha ka tnat bording.
Haba kren sha ki lad pathai khubor ha ka Sngi Ba-ar, u Myntri Rangbah u la ong, “Ngi la hap ban pynlut haduh kumba T.3 klur ha ka shi sngi ban thied ïa ka bording namar ka jinglong jingman bad ki jingeh ba ngi ïakynduh ha kaba ïadei bad ka jingpynmih bording mynta. Na kane ka daw, lada kane ka jinglong jingman ka dang ïai bteng ha kine ki 100 sngi ban wan, ngin hap ban pynlut sa kumba T.300 klur ban thied bording bad ban dang ïai bteng ïa kane ka jingpynlip ding ilektrik.”
Nangta u Myntri Rangbah u la ong wat la ka jinglong jingman ha ka liang ka bording ka la long kaba pynsohsat bha, hynrei na ka liang jong ka Sorkar ka la ïaleh katba lah ban pynthikna ban ym pynbun ïa ki kynta jong ka jingpynlip ding ilektrik.
Nalor kata, u Conrad u la ong ba ka sorkar ka dang wad ïa ki lad ki lynti ha ka jingïaid shakhmat bad ym tang ban shaniah ha ki hydel projects, kaba haduh mynta ki dang dei tang kine ki tyllong jong ka jingpynmih bording hapoh ka jylla.
“Kaei kaba ngi kwah ban pyntip sha ki baroh ka long ba ka sorkar ka la ïaleh katba lah ha la ka jong ka bor bad hooid ka jinghap slap kan sa lah ban pynbha ïa kane ka bynta. Ha kaba ïadei bad ka jingïaid lynti shakhmat, ka sorkar kan hap ban leit ne wad da ki lad ban pynheh shuh, bad kumta ka ‘Solar Mission’ kan dei kawei na kine,” la ong u Conrad.
Shuh shuh u la ong ruh ba ha kine ki 2 bad 3 snem ban wan, ka jylla kan sa ïoh kham bun ka bording na ka Solar Sector bad ka Thermal Power Plants ka ban sa nang pynheh ïa ka jingdawa bording ka jylla.
“Ngi don ka jingkyrmen ba ngin sa lah ban sdang ïa ka Thermal Power Plants hapoh ka jylla, ka ban sa lah ban weng ïa ki jingeh ha ki por ban wan na ka jingduh bording hapoh ka jylla,” la ong u Conrad.
