Mairang, Jylliew 06:
U President ka United Democratic Party (UDP), Bah Metbah Lyngdoh bad uba dei ruh u MLA ka Mairang Konstitwensi u la ong, ka UDP ka la buh ha ka mat trei kam (manifesto) jong ka seng ba ïa ka ‘Reservation Policy’ (RP) kin peit biang bad ka shong ha ka seng ba hangno kin shim ban ïakren ïa kane ka bynta.
U Bah Metbah u la ong, “Ka donkam ïa ngi ruh ban pule bad nga kwah ban pynshai hangne ba kam kut tang 40 na ka 40 ha kaba ïadei bad ka sobjek jong ka reservation policy.”
Ïa kane u Bah Metbah u la pynpaw haba kren ha ka jingïalang kaba la pynlong ha phyllaw ïing jong ka ophis treikam jong ka seng kaba don ha ka shnong Mairang Mission ha ka Sngi Ba-ar ka taïew.
Katei ka jingïalang ka long ruh kum ka jingïalang ban ai khublei ïa ki paidbah kiba la pynjop ïa u ha ka ilekshon kaba la dep, ha kajuh ka por ban pynshai paidbah halor ka bhah thung kam thung jam hapoh ka Jylla.
U Bah Metbah u la ong ruh ba kumba la dep ban pynpaw ba kane ka dei ka sobjek kaba yn hap ban husiar bha haba ïakren bad ïatai ïa ka.
U la ong ruh ba “Ka jingangnud bad ka jingthrang ka jong ngi ban jngoh biang ïa ka reservation policy ka long namar ba ngi ïohi ba katto katne ki jingduna kiba don ha ka reservation policy, kam dei tang ka 40 la 40 namar ba lada ïakren tang 40 la 40 ka la long kaba bakla bad ka don shibun ki jingthoh ki jingbatai shaphang kane ka 40 la 40 bad ka donkam ban ïakren ïathir bha ha kaba ïadei bad kane.”
Shuh shuh halor ka jingbuh jingkylli jong kiwei ki seng, u Bah Metbah u la ong, “Nga kwah ban jubab ba balei um leit kyrshan ïa kawei ka seng saiñ hima kaba ïakhun na ka bynta ka reservation policy, nga kwah ban ong ba kaei ka jingthmu, kaei ka jingangnud, kaei ka lynti, kaei ka jingkwah ngam pat lah ban shemphang. Namar kata ka daw ngam lah ban ong, ngi dei la kajong ka seng saiñ hima, ngi ïa ïaid bad la ka jong ka seng,” bad bynrap ruh da kaba ong, “Ngam kwah ban kynthoh ïa ka kam jong kiwei ki seng.”
U la ong, “Leh ma ki, ki sngewdei ban leh ngam ong eiei bad kaei kaba kut jong kane ka jingïakhih ka long ba ïa kane ka sobjek kan hap ban leit sha ka expert committee”.
U Bah Metbah u la ong ruh ba la don ba buh jingkylli ïa u ruh ba balei um ïakhih lang, hynrei na ka liang jong u, u la pynpaw da kaba ong “La jied ïa nga mynta bad ngi la ïadon lang ha ka sorkar, ka dei ka kamram ka jong nga ban ïakren bad ka sorkar.”
