Shillong, Jylliew 07:
Ki seng na Garo kiba treikam ha Ri-lum Khasi, ki la dawa na ka Sorkar Jylla ba kan ai bynta lem ïa ki paid Garo kiba shong ba sah ha Ri-lum Khasi na ka bhah 80% jong ka Job Reservation Policy ba la mang sha ki Khasi-Jaiñtia bad Garo da kaba kam ba kine ki paid Garo kim ju ïoh bynta satia na kane ka bhah naduh ba sdang pyntreikam ïa ka State Reservation Policy hapoh ka Jylla.
Kine ki seng ki kynthup ïa ka All Khasi Hills Achik Federation, Garo Students’ Union Khasi Hills Zone, Achik Holistic Awakening Movement SWKH Zone bad ka United Achik Youth Federation.
Ha ka sngi Balang, kine ki Seng ki la leit ban aiti da ka dorkhas ha u Myntri ka tnat Pule Puthi u Rakkam A Sangma ban kyrpad ba un pyrkhat lem ïa ki jingeh jong ki paid Garo ba sah ha Ri-lum Khasi bad ban ïakren lem ruh ha ka Sorkar Jylla ba kan leh eiei halor kane ka kam.
“Ngi kum ki President, Secretary bad ki nongïalam seng Garo hangne ha ri-um Khasi ngi kwah ban pyntip ba ki don bun ki jaidbynriew Garo kiba shong ba sah ha kylleng ki bynta jong ka Ri-lum Khasi naduh ki por hyndai hynthai haduh mynta bad bun ki Garo ki don ïa la ki jong ki jaka ne A.khings Land kiba hap hapoh u pud u sam jong ki distrik bapher bapher,” la ong kitei ki seng ha ka dorkhas.
“Ki Garo kiba sah ha Ri-lum Khasi ki don ïa kajuh ka hok kumba la kdew ha ka Riti Synshar ka ri kumba ïoh ki jaidbynriew Khasi, hynrei naduh ba la pyntreikam ïa ka Reservation Policy ha u snem 1972, ki Garo kiba sah ha kylleng ka ri Khasi ki la duh bynta na ka bhah 80% jong ka Reservation Policy ba la mang sha ki Khasi-Jaiñtia bad Garo,” ki la bynrap.
Katkum ka jingong jong ki, “Kam shym la don satia kano kano ka kyndon ne ka jingpynbna paidbah kaba la pynmih da ka sorkar Meghalaya ka ban khang pyrshah ïa ki jaidbynriew Garo kiba sah ha Ri-lum Khasi ban ïoh jingmyntoi ne bhah”.
Kine ki seng kila pynpaw ruh ba ki don bun tylli ki skul Garo ha kylleng ka Ri-lum Khasi ha ki jaka kiba ki Garo ki bun paid bad na ka liang ka sorkar jylla kala sdang ban pynrung ïa ka ktien Garo ha ki skul sorkar hynrei kaba lyngngoh ka long ba ki nonghikai kiba la shah thungkam ban hikai ïa ka ktien Garo kim dei satia ki Garo ne kiba la don ïa ka syrnot ba ki la pyndep ïa ka jingpule ha ka ktien Garo.
“Ka jingbym don ki nonghikai kiba biang ban hikai ïa ka ktien Garo ha ki skul ka la buh ha ka jingeh kaba khraw ïa ki khynnah pule Garo ban ïoh ïa ka jinghikai kaba biang ba kin pule ïa ka Garo. Kumta ban weng ïa kane ka jingeh bad ban ai jingmyntoi ïa ki khynnah pule. Ngi kyrpad ban shimkhia lem halor kane bad ba ki bor kiba dei khmih kin shim ïa ki lad ban thung da ki Garo ba kin hikai ïa ka ktien Garo ha kylleng ki skul sorkar,” kila ong.
