Don 2.5 lak ngut kiba kyrni ha u drok ha Meghalaya, kham bun ki dei ki samla 

Lada ai jingkheiñ lei lei haduh mynta, lehse ki la nang bun shuh shuh ki briew kiba kyrni ha u drok.

Shillong Jylliew 07:

U Myntri ka tnat Social Welfare, Bah Paul Lyngdoh, u la ong ba ka jingdon kiba la ngop bad kyrni ha u drok ka kham jur eh hapdeng ki samla kaba la sdang naduh kiba dang hapoh 20 snem ka rta lane ki teenagers ter ter haduh kiba la kynjoh 25 haduh 30 snem ka rta.  

U Bah Paul u la ïathuh ïa kane haba kylli halor ka jingong jong u ba ki la don kumba 2.5 lak ngut ki briew ha Meghalaya kiba la ngop bad kyrni ha u drok. 

Nangta u la ong ba ka jingkheiñ kaba pyni ba ki don kumba 2.5 lak ngut kiba kyrni ha u drok, ka dei kaba la pyni lai snem mynshwa. Lada ai jingkheiñ lei lei haduh mynta, lehse ki la nang bun shuh shuh ki briew kiba kyrni ha u drok.

U la ong ba kita kiba ngop ha u drok ki la khlehlang naduh ki kynthei bad ki shynrang, hynrei kiba kham bun ki dei ki samla kiba dang rit ka rta ter ter haduh kiba la kynjoh 25 haduh 30 snem ka rta.

U la ong ba kane ka jingkheiñ ka dei kaba la rim bad donkam ban lum jingkheiñ thymmai biang haba ïadei bad ka jingdon kiba kyrni ha u drok bad ïa kane yn sa leh da ka survey lane ka jinglum jingtip kaba thymmai.

Haba ïadei bad ka jingtehlakam bad leh ei ei ban pynsaja ïa ki briew ka aiñ kum ki pulit kiba donkti ha ka jingpynïaid ïa u drok, u Bah Paul u la ong ba mynshwa u la rah teng ïa kane ka mat ha Ïingdorbar Thawaiñ bad mynta ba u la don kum u Myntri Sorkar uba peit ïa ka tnat Social Welfare un shim ki lad ki lynti ba da lei lei yn nym ailad ïa ki briew ka aiñ kiba phong uniform ban leh kum ka kita ki kam, bad kino kino kiba ïoh jingtip kum kata, dei ban ïarap ban ïathuh bad pyntip sha u ruh kumjuh.

Halor ki jaka sumar ban pynbeit biang ïa kiba la ngop ha u drok lane ki Rehabilitation Centre, une u Myntri ka tnat Social Welfare u la ong ba ka Sorkar kan pynkhreh ïa ka jingtyrwa khnang ba yn lah ban sdang ïa ka jaka sumar kaba dei jong ka Sorkar namar kumba ka long mynta, ki don ki jaka sumar kiba peit ba khmih da ki kynhun shimet kiba ka Sorkar ruh ka ju ai jingkyrshan, bad lehse ka bai sumar ruh ka kham rem.

Halor ka jingpynbeit ïa ki kyndon ka NDPS kiba buh jingeh ha ka jingïakhun ia u drok, u Bah Paul u la ong ba ka Sorkar Jylla ka lah ban leh tang ïa ki kyndon, hynrei ïa ka aiñ kaba dei jong ka Sorkar Pdeng ym lah ban leh da ka Sorkar Jylla.