Shillong, Jylliew 07:
Hadien ba arngut ki MDC ka Congress ki la pynïasoh noh ïalade sha ka NPP kaba dei ka seng kaba bat ïa ka bor synshar ha Sorkar Jylla, mynta ka kynti ka la sdang ban khroh sa ïa u MDC shimet na Nongthymmai Konstitwensi, Bah Latiplang Kharkongor.
Ki khubor kiba ïajan bha ki ïathuh ba u Bah Carnes Sohshang MDC na Mawkyrwat bad u Bah Batskhem Ryntathiang MDC na Mairang kiba dei na ka seng Congress ki lah ban leit pynïasoh noh sha ka NPP ha kine ki sngi ban wan.
Kine ar ngut ki MDC jong ka Khasi Hills Autonomous District Council (KHADC) ki dei kiba ïakhun ruh na ka tiket Congress ha kane ka ilekshon ba dang shu dep, hynrei ki khlem poi sha ka thong.
Nangta ki khubor ki ïathuh ruh ba kine ar ngut MDC haba ki thmu ban leit pynïasoh sha ka NPP ki la pyrshang ruh ban khroh ïa u Bah Latiplang Kharkongor ban leit pynïasoh lang.
Ka NPP ka la kyrshan ïa ka UDP ha ka Executive kaba mynta kaba la ïalam da u Bah Titos Chyne kum u CEM. Hynrei, kane ka seng ka kwah ban tan kham bun ki MDC khnang ban kham ïoh bor haba ka ilekshon MDC ka la jan.
Ki khubor ki ïathuh ba ka jingsuki jong kine ar ngut ki MDC ban leit pynïasoh sha ka seng NPP ka dei namar ki dang peit bha ïa ka jingai jingkyrshan ki paidbah ïa ka seng VPP ha kine ki sngi kaba u Bah Ardent Basaïawmoit u dang shong shah thngan halor ka jingdawa ban pynkylla ïa ka bhah thung kam.
Nalor kata, ki khubor ki ïathuh ba u Bah Latiplang u la kyntait mardor ban leit pynïasoh sha ka seng NPP namar u sngewthuh ba ki paidbah kim pat pdiang ïa kane ka seng ha rilum Khasi, hynrei un ïeng beit kum u kyrtong shimet ban ai jingshakri ïa ki paidbah ka konstitwensi.
Kine ar ngut MDC ki thmu ban pynïasoh sha ka NPP namar ki paralok jong ki, kata lai ngut ki MDC kiba la long kum ki MLA kiba kynthup ïa u Bah RV Lyngdoh, Bah Charles Marngar bad u Bah Gabriel Wahlang, hynrei uba khlem jop uba dang skhem ha ka Congress un dei sa tang u Bah PN Syiem uba dei u nongïalam ka liang pyrshah ha KHADC.
