Shillong, Jylliew 07:
U Myntri ka Sorkar Jylla uba peit ïa ka tnat Social Welfare, u Bah Paul Lyngdoh u la ong ba ka kaiphod halor ka jingkynnoh ba shalan tuh ïa u khaw jong ka tnat Social Welfare ha ki snem ba la leit ka pyni ba kam don satia ka jingshisha.
Haba ïakren bad ki nongthoh khubor ha ka sngi balang, u Bah Paul u la ïathuh ba ïa ka kaiphod la dep peit ruh da u Advocate General ka Jylla. Na ka liang jong u, katkum ka jingpeit bniah, u la kren shai ba ki jingkynnoh kim long kiba shisha bad ym lah ban kheiñ kam thok ha kaba ïadei bad ka jingpynïaid ïa u khaw.
U Bah Paul u la ong ba ka daw kaba pynlong ban slem ka jingbishar ïa ka mukotduma ka dei namar ka jingslem ban treilang ki pulit ka jylla Assam kiba kurup ïa u khaw bad mih ka jingkynnoh ba la pynïaid ïew tuh ïa u khaw.
U Bah Paul u la ong ruh ba kumba u la shimti mynta ïa ka kam kum u Myntri ka tnat Social Welfare un pynthikna ba ym dei ban don mano mano khamtam u pulit u ban pynlong ïa ka jingtohkit, bad lada jia ba mih kino kino ki jingjia ba ïoh kem ïa ki briew, ka tnat pulit ka dei ban pyntip mar mar sha u Myntri ba dei peit.
