Shillong, Jylliew 07:
Ka puron lamkhmat jong ka phlim ‘Khohwah Nongsor’ ka Barisha Mawlong ka la ïathuh ba ka jingmut jong kane ka phlim ka pyni ba ki samla kynthei haba ki wan pule sha jaka sor ki klet noh ïa ka riam kaba ki ju im ha la shnong hynrei ki hap ban sdang bud tynneng ïa ka riam nongwei.
Ka Barisha Mawlong ka dei shnong trai na Kyrdemkulai bad ka dang leit pule ha Umsning. Ka la shah jied kum ka puron ha kane ka phlim hadien ba wan leh “audition” ha Khasi National Dorbar Hall, Mawkhar, Shillong ha u 2022. Kane ka puron ka la ïoh ruh ban ak lang bad u Pyllaitmitre Lypon uba la tip kum u Sam, ka Sanmilian Mawrie bad u Arman Disiar.
Ban tip kham bniah ïa ka jingïaid lynti jong kane ka puron haba ïadei bad ka jingïoh ban ak ha kane phlim (Khohwah Nongsor) la ïoh ban ïakren kyrpang ha kawei na ki jaka jngohkai pyrthei kaba dang thymmai ha Umsning, Ri Bhoi District.
Ïa kane ka phlim la dep ïoh syrnod na Central Board of Film Certification (CBFC) Regional Office, Guwahati bad mynta ka dang ap pali ban ïoh tarik ban pyni noh ha Bijou Cinema Shillong ha kine ki khyndiat sngi.
Kaba kham khring bha ïa ki paidbah ha kane ka phlim ka dei namar ka jingsngewtynnad ban sngap ïa ka jingrwai ‘Da Ki Sur’ bad ka ‘Shiteng Lynti’ kiba dang shu dep pyllait shen ha YouTube Channel
Ïa kane ka phlim la pynmih da ka Chwa Syiemlieh Film Production kaba dei ka production kaba la pynmih nyngkong ïa ka phlim ‘Jingim’ ha Bijou Cinema, nangta ka Dhaka Escape ka ban sa pyni noh shen bad ka Student Bangalore kaba dang thmu ban leit ringdur noh.
Haba ïakren bad ka Barisha Mawlong ka la ïathuh ba ka jingsdang ban poi sha ki kam ak phlim ka dei naduh ba ka la ïoh ban ak ha kawei ka music video kaba ai kyrteng ‘Por Samla’ bad u Arman Disiar. Kane ka jingrwai ka la ïaid ïew bha ha YouTube kat haduh ba u trai kane ka phlim u la ibit ban khot ak ha ka phlim Khohwah Nongsor.
Ka la pynpaw ka jingsngewkmen ba ka la ïoh ban ak bad u Pyllaitmitre u tyngshop uba la kham paw paidbah.
Kumta ka kyrpad ïa ki paidbah ba kin ai jingkyrshan ïa kane ka phlim ynda la ïoh tarik ban pyni ha Bijou Cinema Shillong.
