Shillong, Jylliew 07:
Kumba ka Synjuk Nongñiah Taxi Sor bad Khapsor ki la dep shim ïa ka rai ban ïatreilang mynta baroh taïew, hynrei lada ka Deputy Commissioner ka East Khasi Hills District kan dang bteng biang la shem taïew ban phah ïaid pud sngi ne odd & even ïa ki kali ban rung sha Khyndailad bad Motphran kan ym ïatreilang shuh.
Haba ïakren bad u Bah Shimladbiang Rynjah uba dei u Vice-President ka Synjuk Nongñiah Taxi Sor bad Khapsor, u la ïathuh kumba ka seng ka la kohnguh ïa ka jingkyrpad ka DC ban ïatreilang mynta baroh shi taïew ban pynïaid odd bad even ïa ki taksi kamai ban rung sha Motphran bad Khyndailad ki la kohnguh naduh ka 5 tarik Jylliew 2023. Hynrei kat haduh mynta ka sngi Balang kaba la ïaid lai sngi ym don ba khang ne bat haba ki leit sha kitei ar tylli ki ïew.
U la ïathuh ha ka sngi sdang kaba dei ka 5 tarik Jylliew kaba la buh hukum da ka DC kiba bun ki nongñiah kali ki la kham kiar ban leit sha Motphran bad Khyndailad, hynrei haduh shiteng sngi ym don ba bat bad ki la ïaid beit haduh mynta ka sngi.
Nangta, u la ong haba ym don ba khang lynti ki ïaid beit kumba ju long. Hynrei lada ki pulit ki pyrshang ban khang lynti kin kohnguh beit ban pynhiar beit ha shiteng lynti ïa ki paidbah.
Nalor kata, u la ong ba kane ka jingkohnguh ki nongñiah taksi ïa kane ka hukum ka dei namar ka jingkyrpad ka DC ban ïatreilang mynta ka taïew ban tip kumno ka rukom pynïaid kali ha Shillong.
“Lada ka DC ka pynmih hukum biang ba kan bteng la shem taïew ban pynïaid da ka odd bad even ngim nym ïatreilang shuh, hynrei ngin ïaid beit kumba ngi la dep ïakren” u la ong.
Ha kajuh ka por u kyrmen ba ka DC kan nym pyntreikam shuh ïa kane ka hukum namar mynta ka taiew ka khlem leh eiei.
Kum ban shu pynkynmaw kane ka jingpyntreikam ka DC ban phah ïaid odd bad even ïa ki taksi kamai ka long naduh ka 5 tarik Jylliew 2023 namar ban pynduna ïa ka jingdheng kali ha kine ki ar tylli ki jaka ïew kaba long ruh katkum ka jingbthah ka ïingbishar Meghalaya High Court.
