Shillong, Jylliew 07:
Ka jingdon jong ki masi ha kylleng ka Jylla kiba shah ktah ha ka jingpang at-sniehdoh ne ka ‘Lumpy Skin Disease’ (LSD) ka long 3982 tylli katba ki masi kiba la suba ïap na katei ka jingpang ki don 29 tylli.
“Ngi don palat 3500 tylli ki masi ha kylleng ka Jylla (naduh u Kyllalyngkot, 2023 haduh hynnin ka sngi) kiba la shah ktah ha ka jingpang at-sniehdoh,” la ong u Joint Director ka tnad Animal Husbandry & Veterinary, Dr. H.K. Marak haba kren bad u nongthoh khubor ha ka Sngi Balang.
Haba ïathuh ba ka jingdon jong ki masi kiba ïap na katei ka jingpang ka duna bha, u Dr. Marak u la ong ba haduh mynta ki masi kiba la suba ïap na katei ka jingpang ha kylleng ka Jylla ki don 29 tylli.
Ha kawei ka liang, u la ong ba na kitei ki 3500 tam ki masi kiba shah ktah ha katei ka jingpang, ki don ruh kiba la koit bad haduh mynta ka jingdon jong ki masi kiba la koit pura na katei ka jingpang ka long kumba 60%.
“Ban pyntikna ba ki masi ki ïoh ïa kane ka jingpang, ngi hap phah ïa ki nongmuna sha Bhopal bad ngi ïoh pdiang ïa ka kaiphod hadien shi taïew,” u la ong.
Ha kajuh ka por, u Dr. Marak u la ong ba shisien ba la suba ba u masi u ïoh ïa katei ka jingpang, na ka liang ki briew jong ka tnad ki la leh ïa kaba donkam.
Haba pynsngew ba ïa katei ka jingpang la pynsaphriang na ka jingdait jong u skaiñ, ’ñiangkhap, u la ong ba ka lah ruh ban ïabit na u masi uba pang sha uba koit.
U la ong ba lada ka jingpang kam i don dak jingkylla hapoh ka shi taïew, kata yn hap ban ai da ki dawai ‘anti-biotic’.
U Joint Director u la kdew ruh ba lait na ka dawai tah na bynta katei ka jingpang, ki nongrep ri masi ki lah ruh ban pyndonkam da u shynrai ban tah ha ki jaka ba at.
“Kan buh jingeh ïa ki nongrep ban pyndonkam da ka dawai tah namar kan donkam bun tylli bad kumta kan ktah ïa ki ha ka liang ka pisa-tyngka, tangba ki lah ruh ban pyndonkam da u shynrai na bynta kane ka jingpang,” u la ong.
Haba kylli, u la ong ba ka tnad ka ju pynlong ïa ki prokram ai jinghikai da kaba kynthup lang ruh ïa ki nongrep kumjuh ki nongot-doh.
“Ym long ban shoh doh ïa u masi uba pang. Kumta ngi bthah ïa ki nongot-doh ba kim dei satia ban shoh doh ïa u masi uba pang,” u la ong.
Na ka liang u Joint Director u la ong ruh ba lada ïoh ka jingsumar kaba biang, kata hapoh ar taïew eiei, ki masi kiba ïoh ïa ka LSD kin sa koit pura na ka jingpang.
Shuh shuh haba jubab halor ka tika, u la bynrap ba haduh mynta, ka tnad ka la dep ban ai 2962 tylli ki tika (haduh hynnin ka sngi) ban ïada na katei ka jingpang at-sniehdoh ha ki masi.
