Shillong, Jylliew 07:
Ka Harijan Panchayat Committee (HPC) ka pdiang ïa ka saiñdur lane ‘blueprint’ kaba la pynkhreh da ka Sorkar Jylla haba ïadei bad ka jingpynkynriah ïa ki 342 tylli ki longïing na Them Metor sha ka jaka kaba la don lypa jong ka Shillong Municipal Board (SMB), bad ki don ki jingai jingmut kiba donkam ban pynbeit ha ki katto katne ki bynta.
Kane ka jingpdiang ka HPC ka la paw ha Ïingbishar lyngba u nongsaid aiñ ba mihkhmat ïa ka HPC.
Katkum ka hukum kaba la pynmih da ka Ïingbishar Meghalaya High Court hadien ba la shim ban bishar ïa ka mukotduma lyngba ar ngut ki nongbishar kiba kynthup ïa u Chief Justice, u Sanjib Banerjee bad u Justice W Diengdoh, la ong ba na ka liang u Advocate General ka Sorkar Jylla u la pyntip ba u nongsaid aiñ ka Harijan Panchayat Committee u la pyntip ba la pdiang ïa ka saiñdur ne ‘blueprint’ kaba la pynkhreh da ka Sorkar, hynrei la ai jingmut ruh ban pynbeit ïa ki katto katne ki bynta kiba don ha ka.
Ka Ïingbishar ka la ong ba namarba ka Sorkar Jylla ka dang peit ïa ki jingai jingmut kiba ïadei bad ka jingpynbeit ïa ki katto katne ki bynta jong ka saiñdur, la buh por lai taïew ban shim bishar biang ïa kane ka kam ha kaba la kyrmen ba kine ki mamla (parties) kin lah ban pynbeit noh ïa kane ka jingeh kaba la sahteng kan kut noh.
Kumta ïa kane ka mukotduma la buh ban shim bishar biang ha ka 3 tarik Naitung, 2023.
Kum ban pynkynmaw, ka Sorkar ka la wanrah ïa ka saiñdur hadien ba la kyntait ïa ka jingtyrwa kaba la wanrah da ka HPC ha ka 25 tarik Ïaïong, 2022 kaba kynthup ïa ka jingai jaka kumba 200 square metre ha European Ward sha man kawei ka longïing baroh 342 tylli nalor ka jingbei ïa ka jinglut ban tei ïa ki ïing.
