Shillong, Jylliew 07:
U President ba rangbah ka Voice of the People Party (VPP), Bah Ardent Miller Basaïawmoit u la ong ba um sngew eiei lada u shah beiñ ha kiwei namar ka jingbym ïahap jong ki ïa u, hynrei kim dei pat ban ïalam bakla ïa ka mat halor ka ‘Reservation Policy’.
“Phi lah ba nym ïahap ïa u Bah Ardent, phi lah ban beiñ ïa u Bah Ardent…kam lei-lei, phi lah ban beiñ ïa ka VPP…kam lei-lei, tangba wat nym ïalam bakla ïa ka mat. Wat nym pyrshang ban pynsngewthuh bakla ïa ka ‘Reservation Policy’ namar kam dei tangba ka ïalam bakla hynrei ka long ka jinglehraiñ namar u paidbah u la stad mynta,” la ong u Bah Basaïawmoit haba kren sha ki lad pathai khubor ha ka Sngi Balang.
U la ong ruh ba katei ha kawei ka liang ka pynlehraiñ pynban ïalade haba kren ïa kaei ka bym dei tang ban pynsngewthuh bakla ïa u paidbah.
Halor ki jingkynthoh kiba la mih pyrshah ïa u ha kine ki khyndiat sngi ba la dep, u la ong ba ka jingthmu jong ka seng bad ki nongïalam haba rah ïa ka mat halor ka ‘Reservation Policy’, ka long tang ban weng ïa ka jingeh haba ïadei bad katei ka bhah thung kam.
U la pynshai ruh ba ka jingïaleh jong ka VPP kam long bad uno-uno u ’riewshimet ne kano-kano ka jaidbynriew, hynrei ka dei ban pynbeit ïa ka jingeh kaba mih na ka ‘Reservation Policy’ kaba la ktah ïa ki samla ka jaidbynriew.
“Ngim don por ban kren ïa ki kam shimet jongno-jongno. Ngi don ïa ki kam kiba kham khraw na bynta ka lawei jong ka jaidbynriew ban saiñdur kumba ngi ong ban pynim pat, ban pynbha pat bad ban pynkylla dur. Te ki kam kiba kham khraw ki don ha ngi ban pynleit jingmut ban ïa kita ki kam shimet jong ki briew,” u la ong.
Haba kdew ba kam don ka jingthmu ban kren pyrshah ïano-ïano, u Bah Basaïawmoit u la ong ba ha ka jingïakhih ba dang shen, ka seng ka la maham ba kum ki nongïalam kim dei ban pynmih ïa kano-kano ka jingkynthoh ïa ki para Garo kiba long ki nongshong shnong ha kane ka Jylla.
“Ka jingkyntu jong nga ïa ki ka long ba kim dei ban artatien ïa ngi kum ka seng ne ïa ki nongïalam namar ngim don jingthmu ban tuh noh ïa ka hok jong ki,” la ong utei u nongïalam.
U la ong ruh ba ka jingïakhih kaba dang shu dep, ka long ka jingjop kaba khraw, namar ka dei ka jingjop ïa ka mat kaba la ïakhih bunsien ba kynthup da ki sengbhalang ha ki snem ba mynshuwa.
“Ka la kylla long kum ka mat jingkular jong ki seng saiñ pyrthei, hynrei kaba shu kut noh tang ha ki jingpynpaw naba kim treh ban kren eiei halor katei ka bynta,” u la ong.
“Mynta ki ong bun uba pyrshah, bun uba kynthoh, hynrei ha ka jingshisha lei u bun uba kyrshan, ym baroh uba sniew, bun uba bha ïa uba sniew, ki don hi keiñ kiba sniew ha ka imlang-shalang. Teng-teng ngi la shu pynheh than ïa kaba sniew ha ka jaidbynriew jong ngi. Nga sngew ba kumba ka long ha kane ka khep ba mynta, ngi la kham ïatylli pynban kum ka jaidbynriew,” u la ong.
Haba pynshai halor ka jingïatylli jong ka jaidbynriew ha kane ka kynti, u la ong ba haba ka nongrim ka skhem bad ka jingïaid lynti ki nongïalam ka beit hakhmat u paidbah, u paidbah u ai beit ka jingkyrshan.
“Ha kane ka kynti ba mynta, lehse kam pat don ka jingïaryntih bad ka jingïatylli kumba ka long ha kane ka jingïaleh jong ngi bad ngam don jingartatien ba nangne shakhmat kan nang kham bha…ngin nang kham ïatylli,” u la ong.
Shuh shuh u President u la bynrap ba kum ki nongïalam kin shim ruh ïa ka kamram ban hikai ïa kaba bha sha ka jaidbynriew.
