Shillong, Jylliew:
Na ka liang jong u Headman bad ki Rangbah ka Dorbar Shnong Umblai ha kane ka taiew kaba mynta ki la pyntip ba ki kwah ban pynshai paidbah halor ka jingmih paidbah jong ka Shnong Umblai ha Daiñthlen bad Weisawdong ha ka 26/05/2023 bad ki la ong ba kam dei ka jingthmu ban pynmih kano kano ka jingkulmar hynrei ban pyni bad dawa ïa la ka jong ka hok longtrai halor ki jaka ki puta ka khyndew ka shyiap ha kitei ki jaka ïa kaba la sdang ban wan leh donbor da kiwei pat. Ki nongïalam shnong ki la ong ba kane baroh ka jia long kumne dei lyngba ka jingleh kheiñ sting na ka liang ka Hima Sohra bad ka KHADC ki bym shym la shim khia ban pynbeit bad ‘approve’ ïa ki pud adong synshar jong ki shnong Umblai, Mawphu bad Laitlyndop kumba la dep ban phah ïa ki kot ki sla ki dulir sha kitei ki bor ba dei peit ïa kaba ki la ïa dawa na ka por sha ka por hynrei ka kam ka dang sahteng sah la shiphew snem tam haduh mynta. Ka daw bah daw san kaba la pynkhih ïa ki paidbah jong ka shnong Umblai ban mih paidbah ha katei ka sngi ka long ka jingwan leh donbor bad thombor na ka liang jong u syiem jong ka Hima Sohra bad ki nongshong shnong jong ka shnong Laitduh ban khrong beaiñ bad kiwei kiwei ki kam ha kitei ki jaka khlem da burom ïa ki ‘stay order’ ba la pynmih na ka KHADC Shillong bad kumjuh ruh na u Sub Divisional Officer (c) Sohra Civil Sub-Division Sohra.
Ha kaba ïa dei bad ki jaka puta ha kitei ki jaka Laitduh, Daiñthlen bad Weisawdong ka Dorbar Shnong Umblai ka Maham jur ba ïoh lehse don kiba die ne thied jaka ha kitei ki jaka namar ym pat lah ban die ne thied jaka ha kitei ki jaka kat ba ka KHADC kam pat ai ne pynmih ïa ka rai. Te namarkata na ka liang jong ka Dorbar Shnong Umblai ka kyntu jur ïa ki bor jong ka KHADC ban shimkhia ban leh kloi ïa kane ka kam khnang ban lait na kino kino ki kynrum kynram bad ki jingeh lyngba ki jingjia kiba lah ban mih ha kitei ki jaka.
Katei ka long kat kum ka kyrwoh ba la phah da u Bah Jlen Sohtun – Headman bad u Bah Kupar Sohtun – Secretary ka Dorbar Shnong Umblai
