Shillong, Jylliew 07:
Ki shipai BSF jong ka 4th Battalion Meghalaya, ha ka miet jong ka Sngi Ba-Ar, ki la ïoh kem ïa 11 ngut ki nong India bad la kurup ruh ïa ki kali kiba la kit palat 11,000 kilo ka shini ba la thmu ban shalan tuh sha Bangladesh.
Ki BSF ha ka Sngi Balang ki la ïathuh ba ki BSF kiba don ha Muktapur, ki la ïoh bat ïa kitei ki kali ha ka por ba ki dang mih na Amlarem. Kitei 11 ngut kiba la shah kem ki khlem lah ban pyni ïa kino-kino ki kot ki sla ha kaba ïadei bad katei ka shini kaba ki la kit ha ki kali. Namarkata, na ka liang ki BSF ki la aiti noh ïa ki kali bad ka shini sha ka tnat Customs ha Dawki ban leh ïa kaba donkam.
Nalorkata, ki BSF ki la ïathuh ba naduh u Risaw 2022 bad haduh mynta, ki la ïoh ban kurup palat 3 lak kilo ka shini kaba la thmu ban pynpoi tuh sha Bangladesh. Ki la ong ba ka jingjur ka jingdawa ïa ka shini na India bad ka jingkiew ka dor ha Bangladesh ki long ki daw kiba la pynjur ïa ka jingkhaïi tuh ïa ka shini.
