Shillong, Jylliew 07:
Ka Voice of the People Party (VPP) ha ka Sngi Balang ka la ong ba kan sa phah jingthoh sha ka Sorkar ban kyntu pynsted haba ïadei bad ka jingtreikam jong ka ‘Expert Committee’ halor ka ‘Reservation Policy’.
“Ka seng kan ym ap haduh ba ka Sorkar kan da khot, hynrei ngi la rai ban ai jingthoh sha ka Sorkar ban kyntu ïa ka ba kan pynsted ïa ka jingtreikam jong ka ‘Expert Committee’ khnang ban pynbeit noh ïa kane ka kam sahteng kaba ngi la dawa,” la ong u President ba rangbah ka VPP, Bah Ardent Miller Basaïawmoit haba kren sha ki lad pathai khubor.
U la pynshai ruh ba ka seng haba ka ïakhih halor ka ‘Reservation Policy’ kam mut ban pynleit jingmut tang ïa ka kam Sorkar, hynrei ka shong ha ka Sorkar kumno ban pynsngewthuh ha ki briew kumjuh ban pynrung ka mynsiem ha ki ban ym lehraiñ ïa ka kam bad ban pynïar ïa ki sap ki phong jong ki.
“Ka jingthaw kam thaw jam kam mut eh tang ha ka kam Sorkar hynrei kiwei pat ki jait kam kiba lah ban ai ka jingmih kaba khraw ha ka liang ka lad kamai,” u la ong.
Haba kylli, u la ong, “Ha kane ka khep kan ym long kumta, nga don ka jingngeit kaba skhem ba kane ka komiti kan ym kut tang ha ka komiti bad na ka liang jong ngi, ngin ïai buddien, pynsngewthuh, ngin kren bad pynshai sha ki paidbah ba ngi donkam ban ïohi ba kane ka komiti kan shim ka sienjam kaba sted ban ai jingmut sha ka Sorkar bad ba ka Sorkar kan pyntreikam ïa ki jingai jingmut ba shongnia jong kane ka komiti.”
Ha kawei ka liang, utei u nongïalam u la khublei ïa ka Sorkar kaba la pyntyllun ïa ki kam ban buh da ka ‘Search Committee’ hapoh ka jingïalam u Chief Secretary ban wad ïa ki ’riewshemphang na bynta ka ‘Expert Committee’.
“Nga ngeit bad shaniah ba ka jingstad jong u Chief Secretary un pynithuh ïa ki briew kiba biang katkum ka jingthmu jong kane ka komiti. Ha ka ‘Expert Committee’, ka Sorkar ka la pynpaw ba kin don ki briew kiba tbit, ki ’riewshemphang ha ka aiñ, nga tharai kata ka la biang hi,” u la ong.
Shuh shuh u la bynrap ba ka ‘Reservation Policy’ kam kut tang ha ka kam Sorkar, hynrei ka Sorkar kan hap ban shimkhia bad peit ba ka rukom bhah bad jingthung kam ha ki tnad treikam shimet (Private Sector) kan ai ka jingmyntoi ïa ki khun samla.
