Shillong, Jylliew 08:
Ka High Powered Committee (HPC) jong ka ïingdorbar thawaiñ ka jylla ka la shong jingïalang ha ka sngi Palei ha hotel Taj Vivanta Shillong ban ïakren halor ka jingtei thymmai biang ïa ka ïingdorbar jong ka jylla kaba don ha Mawdiangdiang.
Ïa ka jingïalang ha kane ka sngi la pynïaid da u Lamphang ka ïingdorbar thawaiñ ka jylla u Thomas A Sangma, ha ka jingïadon lang u Myntri Rangbah ka jylla u Conrad K Sangma, ki Symbud Myntri Rangbah ka jylla u Bah Prestone Tynsong bad Bah Sniawbhalang Dhar, ki MLA bad ki heh ophisar sorkar na ki tnat bapher bapher.
Ha kane ka sngi, katei ka komiti ka la pdiang ïa ka jingtyrwa ban tei arsien biang noh ïa kane ka ïing building.
Haba kren sha ki lad pathai khubor, u Thomas A. Sangma u la pyntip ba ki la ïakren halor ka jinglong jingman jong ki kam ki jam ha ka jingtei ïa ka ïingdorbar thawaiñ bathymmai bad halor ka jingtyrwa ban tei ïa ki jingtei ha ka wat ka ba-ar bad ban khmih ruh ha kaba ïadei bad ka jingpynbit pynbiang ha ki kam pahara.
U la ïathuh ba ka HPC, ka Assembly Secretariat bad ki tnat sorkar bapher bapher ki la mynjur ïa ka jingtyrwa na ka bynta ki jingtei ha ka wat ka ba-ar bad ïa kane ka jingtyrwa yn sa phah sha ka Ministry of DoNER.
