Shillong, Jylliew:
U Myntri ka tnat Pule Puthi ka Jylla, u Rakkam A Sangma, u la pyntip ba ka sorkar jylla ka la dep ban thoh sha ka National Testing Agency (NTA) na ka bynta ban buh kham bun tylli ki jaka thoh ïa ka eksamin CUET hapoh ka jylla.
Haba kren sha ki lad pathai khubor ha ka sngi Balang, u Myntri u la ong ba kane ka jingphah jingthoh ka la long ruh hadien ba kiba bun ki seng ki la wanrah shakhmat ïa kane ka mat kaba la pynlong ïa ki samla pule ka jylla ban mad jingeh namar ka jingduna palat ki jaka ïakhun ïa kane ka eksamin.
“Ngi dang ïakren bad ka Sorkar Pdeng bad kumjuh ruh bad ka NTA na ka bynta ban buh kham bun ki jaka thoh eksamin hapoh ka jylla ka ban pynsuk pat ïa ki samla pule jong ngi,” la ong u Rakkam.
Shuh shuh na ka liang jong u Myntri ka tnat Pule Puthi u la ong ba ka North Eastern Hill University (NEHU) ruh ka la pynbeit thymmai ïa ka tarik ban pynlong ïa ka eksamin hadien ba la ïoh jingtip jong ka jingïatyngkhuh jong kine ki eksamin.
