Shillong, Naiwieng 12
Hadien ba la kut ka jingai por ka Meghalaya College Non-Teaching Employees Association (MCNTEA) ïa ka Sorkar ban pyllait noh ïa ka Arrear Dearness Allowance (DA) ba 49%, 51% bad 53%, ha ka sngi Palei ka la pynbna ban pynlong da ka jingïakhih shong kyllaiñ mungor (Sit In Demonstrations) kaba kin sdang ha ka 17 tarik u Naiwieng 2026.
Haba kren sha ki nongthoh khubor ha ka sngi Palei u President ka MCNTEA u Bah Jewel Son Roy Lyngdoh Khongjoh u la ïathuh ba kane ka jingïakhih shong kyllaiñ (Sit In Demonstrations) jong ki kan dei ha la ki jong ki College kiba hapoh ka Khasi Hills ha Ri-Bhoi bad ha Garo Hills.
Ka Sorkar kam shym la jubab ïa ka jingkyrpad jong ngi ban pyllait noh ïa ka Arrear DA jong ngi kaba dei 49%, 51% bad 53%, kumjuh ban shah ban thep lang ïa ka DA ha ka tulop jong ngi wat hadien ba la ai por ban pyllait hapoh ka 01 tarik u bnai Naiwieng 2026″ la ong u Bah Jewel.
U la kynnoh ba na ka liang jong ka Sorkar ka leh mynthi bad leh bymsuidñiew ïa kane ka jingaipor bad ka jingkyrpad jong ki, “Ka long kaei-kaei kaba sngewsih ban ïohi ba ka Sorkar ka ibeiñ ïa ngi. Ha ka jingshisha ka dei ka Sorkar ban peit ïa ka bit ka biang jong ki nongtrei jong ka, hynrei ha ngi hangne pat nga ïohi kumba ka long da khongpong pynban” u la kynnoh.
“Ka Sorkar ka leh kyllut, ka leh matlah, ka pynjynjar pynban ïa la ki jong ki nongtrei, ka pynpoi shaduh u pud ba ngi hap ban ïa mih madan ban ïeh ïa ki kam ki jam jong ngi ban dawa ïa ka bhah kaba dei hok ka jong ngi” u la ong.
Shuh-shuh u la ong ka jingmynthi jong kane ka Sorkar ka long kaei-kaei ka bym lah ban pdiang, wat hadien ba ki la ai por ruh ka Sorkar ka khlem leh eiei lane ban khot ïakren ban ïasyllok khnang ban lah ban ïapynbeit noh ïa kane ka kam.
Haba jubab ïa ki jingkylli, u Bah Jewel u la ong, “Lada ka Sorkar kam leh eiei ïa kine ki jingdawa haba la sdang kane ka jingïakhih, kin sa nang pynkhlaiñ shuh-shuh da kiwei pat ki prokram bad ki rukom ïakhih ban pynbor ïa ka Sorkar” u la ong.
