Shillong, Naiwieng 12
Ka Khasi Jaiñtia Presbyterian Assembly ka pynpaw ba ka jingthmu bad ka nongrim jong ka Maverick City Music Gospel Concert ka ban sa long ha ka 12 tarik u Nohprah 2026 ha Madan Polo Shillong ka long shi bynta ban pynkhreh ïa ka aïom lehkmen shuwa jong ka jingrakhe ïa ka Khristmas.
Haba kren sha ki nongthoh khubor na ka liang u Rev. S. Diengngan, Administrative Secretary KJP Assembly u la pynshai haba ïadei ki jingmih ki jingpynsngewthuh bakla ïa kane ka Gospel Concert, da kaba u la ong ba ka Sorkar ka long tang kum ka nongïarap ha ki bynta ba donkam, hynrei ïa kane ka Concert la pynïaid bad longtrai da ka KJP Assembly.
“Ka jingthmu ba kongsan jong kane ka Gospel Concert ka long ban rakhe ïa ka aïom Khristmas ha ka rukom kaba pher, da kaba ai lad ïa ki paid riewngeit ban ïashim bynta ha ka jingmane, ka jingïaroh bad ka jingpynkhraw ïa U Blei (Praise & Worship), ngi kwah ba lyngba kane ka prokram, ki paid riewngeit kin ym kut tang ban mad ïa ka jingrwai bad jingkmen, hynrei kin ïoh ruh ïa ka jingshem kaba kynja mynsiem lyngba ka jingmane bad ka jingïaroh ïa U Blei” u la ong.
Shuh-shuh u la ong haba ïadei ka jingshim tiket, u Rev. Diengngan u la pynshai ba ka KJP Assembly ka don shibun ki jingpynlut ha ka jingïadei ban pynbeit bad pynbit pynbiang ïa kane ka Concert bad ba kan long ruh ka jingsynñiang ban kyrshan ïa ki kam jong ka KJP Assembly, namar kata la shim tiket khnang ban lah ban bei tyngka ïa ki jinglut jingsep, “Ka jingnoh synñiang jong phi lyngba ka tiket kan long ruh ka jingkyrshan ïa ki kam shakri bad ki projek kiba lah ban wanrah ïa ka jingkylla kaba bha ha ka jingim jong kiba bun ha ka imlang sahlang”.
“Ngi kwah ban kyntu ba kane ka Concert kam dei tang ban pynkmen ha kato ka miet, hynrei ban pynlong ka jingkmen ka jingkyrkhu ïa kiba bun.”
Ka KJP Assembly ka kyrpad ïa ki paid riewngeit ba kim dei ban sngewthuh bakla ïa ka jingpynlong ïa kane ka Concert kumba la shah kynthoh ha ki rynsan ïathir paidbah (Social Media) bapher-bapher.
Nalor kata ka la khot sngewbha ïa baroh ki paid riewngeit jong ka Balang lem kiwei ruh ban ai ka jingkyrshan ïa kane ka jingthmu jong kane ka prokram bad ba kan long ba jop, “Ngi kyrpad ïa phi ban ïa don bynta lang ha kane ka jingrakhe Khristmas kaba kyrpang ban ïa mane, ban ïaroh ïa U Blei bad ban ïasnohkti lang ha ka kam shakri ïa ki para briew, to ngin pynlong ïa kane ka Gospel Concert kaba jop.”
