Shillong, Naiwieng 12
Ka Joint Action Committee (JAC) ryngkat bad ki longkmie ki paidbah na kylleng ki jaka, ha ka sngi Palei, ki la leit ban tur sha khyrdop Secretariat ban dawa na ka Sorkar ban weng noh mardor ïa ka projek Ropeway na Lum Shy-llong.
Ka jingïakhih pyrshah ïa ka projek Rope-way ka la jan pynmih ïa ka huri-hura kaba jur shabar ka Secretariat hadien ba ki pulit ki la khang ïa ki nongïakhih ban thom ïa ki jingker ban tur hakhmat khyrdop Secretariat.
Hadien ba la poi hakhmat Secretariat, ka jingïapyni bor ka la mih hadien ba ki longkmie ka JAC ki la tur beit -beit ïa ka jingker ki pulit ban leit rah plakad ha khyrdop Secretariat.
Ki nongïakhih ki la pyrshang ban rat ïa ki jingker ba la pynïeng mar pyrshah ka khyrdop, haba dawa ba dei ban ailad ïa ki ban shong ïakhih hakhmat ka khyrdop Secretariat.
Ki pulit ki la ïengskhem khlem ailad bad ki la weng ïa ki mattres ba ki la wanrah lang ban ïashong kyllaiñ mungor, kaba lam sha ka jingïania kaba jur hapdeng ki arliang mamla. Ïa kane ka jingïaid paidbah la sdang naduh ka jaka ïakhih ka JAC ha motdur u Kiang Nangbah ter ter shaduh ban da poi hakhmat Secretariat.
Ïa kane ka jingïatur paidbah la pynlong hapdeng ka jingpahara kaba khlaiñ bha, kaba la jia ruh shisngi hadien ba ka JAC ka la kyntait ïa ka jingtyrwa jong ka South Shillong Advisory Committee, ban kyrpad ïa ka Sorkar Jylla ba kan thung ïa ka jingtohkit ba laitluid da ka Expert Committee halor ka projek bad ka jingktah jong ka ïa ka mariang.
Ïa kane ka jingtyrwa la ïakren ha ka jingïalang ba la pynlong da u Myntri Sorkar bad MLA ka South Shillong, u Bah Sanbor Shullai ha ka sngi Balang ha State Convention Centre.
Ki kynthei ba ïakhih, ki la rah lang ïa ki plakad ba dawa ïa ki hynñiew ngut ki Rangbah Shnong ka Laban ba kin hiar shuki noh mardor bad ban pyndam noh ïa ka soskular aiwai jaka ba ki la ïasoi bad ka tnad Tourism ka Sorkar Jylla.
Ki la ong ruh “Ka kam jngohkai ka lah ban leit shano shano ruh hynrei ka ‘catchment area’ kam lah ban leit. Ki paidbah ki donkam ïa ka um na Lum Shyllong”.
Ki nongïalam ka JAC ki la ong, ba kin nangpynjur ïa ka jingïakhih, tad haduh ba ka Sorkar ka kloi ban pyndam bad pynkynriah noh ïa ka projek sha kiwei pat ki jaka.
