Shillong, Naiwieng 12
“Sangeh noh ka kylli kaei kaba bakla. Sdang ban kylli kaei kaba phi lah ban leh hi dalade ban wanrah jingkylla.”
Katei ka dei ka khubor ba u Myntri Rangbah ka Assam, u Himanta Biswa Sarma u la rah sha Tura ha ka Sngi Palei, kum u kongsan ha ka sngi ba-ar jong ka jingrakhe Jubili Ksiar 1000 Ksing jong ka tamasa Wangala, 2026.
Haba kren ha ka jingïalang kaba dap smam, u Sarma u la ong ba ka thaiñ ka don ïa ka jinglah kaba khraw, ka bym pat shym la pyndonkam, hynrei ka jingkiew kaba don jingmut kan sdang tang ynda la pynkylla nyngkong eh ïa ka jingmut-jingpyrkhat jong ki briew bad pynroi ïa ka jingngeit ba ka jingkylla kaba manbha ka lah ban urlong.
Ka imlang-sahlang, u la ong, ka donkam ban ïaid shakhmat ym tang ban pynithuh ïa ki jingeh bad ban kynthoh ïa ki jingduna. Ki briew ki kloi ban kdew kti ïa ki surok kiba sniew, ka jingbym biang um bad ka jingpynkhuid ïa ki jaboh-jabaiñ, hynrei khyndiat ngut eh kiba kloi ban shim ïa ka jingkitkhlieh ban pynbeit ïa ki.
Da kaba shim nuksa na ki 8 snem jong u kum u Myntri Rangbah bad arphew snem ha kiwei pat ki kyrdan kam paidbah, u Sarma u la ban jur halor ka jingdonkam ban buh hakhmat eh ïa katto-katne ki jingthmu kiba lah ban kynjoh – ban ïa kaba pyrshang ban pyndep ïa baroh shisien leh. Ka jingpynithuh ïa ki lad jingpynbeit kiba lah ban leh, ki jingdon-jingem kiba don, bad ki lad ki kabu kiba kyrkieh, ka lah ban ïarap ban pyntyllun shakhmat, ban tei ïa ka jingshaniah bad plie lynti ïa ki sienjam kiba kham heh.
U la pynpaw ruh ïa ka jingdonkam ban tei ïa ki kynhun kiba aiti bad ban kynthup ïa ki ‘riew shimet kiba don ka jingthmu shisha ban wanrah jingkylla.
Ka kynhun barit jong ki briew kiba aiti lut, u la ong, ka lah ban ai mynsiem ïa kiwei pat bad ban thaw ïa ka jinglong-jingman kaba manbha ha ka rukom trei.
U la kdew ïa ka jingkylla ha ka rukom treikam jong ka Sorkar Meghalaya ha kine ki 8 snem ba la dep, da kaba pynshong nongrim ïa ka jingkiew jong ka sha ka jingkiew kaba aiti lut, ka jingïatreilang bad ka jingngeit kaba nangroi ha ka jinglah jong ka Jylla.
Da kaba kubur ba ka Meghalaya ka dang ïai bteng ban ïakynduh jingeh ha ki katto-katne ki dak jingkdew jong ka roi ka par haba ïanujor bad ki kyrdan jong ka ri, u Sarma u la ong ba kam don daw eiei ban duh jingkyrmen, tangba ïa ki jingshisha la ithuh bad pynbeit lyngba ki jingpyrshang kiba ïai bteng.
Ka roi ka par kaba kit jingmut, u la ong, ka donkam ïa ka por, ki shlem treikam kiba khlaiñ bad ka ‘Capacity-Building’ kaba ïai bteng; bad ki jingmih na ki sienjam ba la shim ha kine ki 8 snem ba la dep, mynta ki la sdang ban paw.
U la kdew ba ka Meghalaya ka la nang kham paw shuh-shuh ha ka kyrdan jong ka ri, ha kaba ka ophis jong u Myntri Rangbahduh ka wad jingtip halor ki katto-katne ki sienjam bad la khot ruh ïa ka Jylla ban ïasam ïa ki jingshem jong ka bad kiwei pat ki Jylla.
U la kdew khamtam eh ïa ki jingthmu ba ïadei bad ka ‘Early Childhood Development’ jong ka Jylla bad ka ‘1000 Days Programme’, kaba phaikhmat sha ka bha ka miat bad jingheh-jingsan jong ki khynnah rit.
Ka jingbei tyngka ha ki khynnah mynta, u la ong, ka long kaba donkam bha na ka bynta ban tei ïa ka jingdonkam nongtrei na ka bynta ka India kaba roi ba kiew hapoh jong u snem 2047, naba ka pateng ban wan ha kaba kut kan sa ïalam ïa ki shlem treikam ba paw jong ka ri, ka ïoh ka kot bad ka imlang-sahlang.
U Sarma u la ong shuh-shuh ba ka Meghalaya ka la nang kiew da kaba thaw ïa ki rukom treikam kiba ïahap bad ka bor bad ka jinglong-jingman jong ka; ban ïa kaba shu pynwandur ïa ki nuksa na kiwei pat ki jaka.
U la kdew ruh ïa ka jingïashim bynta jong ki paidbah kum kawei na ki jingdon-jingem kaba khraw tam jong ka Jylla bad pynpaw ïa ka jinglah jong ka rep ka riang, ‘Horticulture’, ‘Information Technology’, ki kam pynmih jingbam bad kam jngoh kai pyrthei.
U la pynpaw ka jingkyrmen ba ki prokram bad ki ‘Workshop’ kin pynshlur ïa ki nongïashim bynta ban pynthymmai ïa ka jingshaniah skhem jong ki ha ka jinglah ban wanrah ïa ka jingkylla, ban ïoh jinghikai na ki jingshem kiba jop ha kylleng ka pyrthei bad ban pynkylla ïa ki buit jong ki sha ki kam kiba kit jingmut.
Ka prokram ka la sdang da ka jingsam ïa ki ‘Memento’ sha u Kongsan bad u Symbud Kongsan, u Myntri Sorkar, u Timothy D. Shira, bud sa ka jingrwai jong ka ‘Wangala’, “Dimdim Dimchong Dachichong”.
Ki jingrakhe ki la bteng da ka jingshad tynrai ‘Ruga’, bud sa ka jingtem jong ki 1000 Ksing kaba i-shongkun da ki kynhun bapher-bapher ka Wangala, kaba pyni ïa ka jingriewspah jong ka kolshor bad ki riti-dustur jong ka jaidbynriew Garo.
Hadien ka jingkren, la pynlong ïa ka jinglehniam tynrai jong ka ‘Rugala’, ka jinglehniam kaba kongsan kaba don jingïadei bad ka tamasa ot jong ka Wangala, ha ka jingdonlang u Kongsan bad Symbud Kongsan. Ha kane ka sngi, la pynlong ruh ïa ki jingïakop ïalehkai tynrai bapher-bapher.
