Shillong, Naiwieng 12
Hadien katto katne por ba ka South Shillong Advisory Committee ha ka jingïalam u Bah Sanbor Shullai, Chairman, ka la leit ban buh ïa ka shithi ha ka kamra u Conrad K. Sangma, Myntri Rangbah ka Jylla ban dawa thung noh da ka Expert Committee, haba ïadei bad ka projek Ropeway, na ka liang ka Joint Action Committee (JAC) ka la kyntait ïa kane ka ‘resolution’.
Haba kren sha ki lad pathai khubor, ka Kong Deborah Marbaniang, President, ka la ong ba kum ka JAC kam pdiang ïa katei ka ‘resolution’ da kaba kdew, ba ki khlem ïasoi ïa kano-kano ka jingmynjur halor kane ka kam.
Ka la ong ruh, ba kum u MLA uba long kum u kpa ka Konstitwensi, u dei ban lum ban lang ïa ki rangbah shnong hynrei dei ma u, uba pynpharia bad pynmih ïa kiba pyrshah ïa ka JAC.
“Ngin nym sangeh bad ngin ïeng beit ban ïakhih. Bah Sanbor ka jingdawa jong ngi ka long ban pyndam noh ïa kane ka projek ha Lum Shyllong,” ka la ong.
“Ha katei ka jingïalang ba dangshu dep, bun kiba wan dei na ka JAC hi, bad kumno haba ngi ka JAC ngim shym la ai kano-kano ka jingmynjur ban thaw da ka komiti haba ïadei bad kane ka projek hynrei u MLA u la phah da ka shithi sha ka Sorkar, khlem ka jingïasngewthuh lang. Ngi pynrem ïa kane ka jingleh u Bah Sanbor,” la ong ka Kong Deborah.
Haba bynrap pat na ka liang ka Kong Alvareem Marweiñ, dkhot ka JAC, ka la ong ba u MLA u ong ba ki long kum shipara ïa kiba wan ban ïashim bynta ha ka jingïalang, hynrei kaba sngewsih pat ka long ba syndet syndet u la pynkut ïa ka jingïalang.
“Haba la mih na katei ka jingïalang, ki nongbud jong u, ki la long kum kita ki ‘gunda’ bad i kumba kin shu bam wat ïa ki kynthei ruh, khlem ka jingburom shuh,” ka la ong.
Na ka liang ka Dr. Linda Marbaniang pat, ka la ai khublei ïa kiba wan ïashim bynta ha ka jingïakhih bad kin sa pyntip shuh shuh ïa ki prokram nangne shakhmat.
