Shillong, Naiwieng 12
Ka mat halor ka projek ‘Shillong Ropeway’ ha ka Sngi Palei ka la sakhi ïa ki 2 liang mamla – kawei ha kaba ki nongïakhih ki la ïaid paidbah sha Secretariat ban dawa pyndam noh ïa ka, katba kawei pat ha kaba u MLA ka South Shillong, Bah Sanbor Shullai u la aiti ïa ka jingtyrwa sha u Myntri Rangbah ka Jylla na ka bynta ka lad jingpynbeit ka ban pynshong nongrim lyngba ka stad saian.
Haba ïalam ïa ka ’19th South Shillong Advisory Committee’, u Bah Sanbor u la aiti ïa ka dorkhast sha ka ophis u Myntri Rangbah ka Jylla, u Conrad K. Sangma, da kaba kyntu ïa ka Sorkar ban thaw da ka komiti ba laitluid jong ki ‘riew shemphang ne ka ‘Independent Expert Committee’ ban peit bniah ne ‘test’ ïa ki jingkam jong ka JAC ba ka ‘Ropeway’ kan pynjulor ïa ki tyllong um.
U Bah Sanbor u la ong ba ka komiti ka treikam katkum ka jingbthah jong kito kiba kyrshan ïa ka jingtohkit na ka liang ki ‘riew shemphang ha ka jingïalang kaba la long ha ka Sngi Balang ha State Convention Hall.
“Kito kiba kyrshan ïa ka jingtyrwa ban don ka ‘Expert Committee’ ki la wan ban aiti ïa ka jingtyrwa. Hynnin ka sngi, ngi la buh hakhmat jong baroh ki Dorbar Shnong, ki nongshim bynta bad ka JAC, hynrei ha ka jaka ban ïakren halor ka jingtyrwa, ki la thaw jingkulmar ha ka jingïalang,” u la ong.
U la ong ba u Myntri Rangbah ka Jylla uba dang leit jingleit un sa ïakynduh ïa ka komiti ha ka taïew ban wan ban ïakren halor kane ka jingtyrwa.
“Ngin sa ïakren bad u Myntri Rangbah ka Jylla namarba ka jingtyrwa jong ngi ka long ban thaw ïa ka komiti kaba laitluid jong ki ‘riew shemphang,” la ong u Bah Sanbor.
Ha kawei ka liang, u Myntri u la kyntait ïa ka jingkynnoh jong ka JAC ba ka jingïalang ka la shu kut noh hak-dak kumto-kumto.
“Kine baroh ki long kiba bakla bad ki bym don nongrim. Kino-kino ki jingkynnoh kiba ki la kynnoh pyrshah ïa baroh kiba wan sha katei ka jingïalang ki long kiba lamler bad ki bym don nongrim. Baroh ki dei ki jingkren ba shu thaw,” u la ong.
Halor ka jingïaid paidbah jong ka JAC, u Bah Sanbor u la ong ba um kren eiei, da kaba pynpaw ba kito kiba leit lang bad u ban aiti ïa ka dorkhast ki dei ki nongshong shnong ba shisha jong ka Laban bad ka 19th South Shillong.
Ka jingthoh ka kyrpad ban thaw ïa ka ‘Expert Technical Committee’ ban jied na ki shlem pule ba paka tam jong ka ri, kynthup ïa ki IIT bad ki NIT, ban pynlong ïa ka jingpule ba bniah, kaba laitluid haba ïadei bad ki jingsngewkhia jong ka JAC.
Ka la maham ruh ba ka jingpynslem kaba ïai bteng kan nang pynkiew ïa ka jinglut jong ka projek bad kan ktah ïa ka pla tyngka jong u paidbah, bad ba ka jingpyndam noh ïa ka projek khlem ki sakhi saian kiba biang, pyrshah ïa ka jingsngew jong kiba bun ki nongshim bynta, kan long kum ka jingpynthut ïa ka roi ka par ha 19-South Shillong.
