Shillong, Jylliew 08:
Ka jingkhlad noh jong u samla Heibormi Laloo, 27 snem ka rta uba shong ba sah ha Mawïong bad u samla Rahul Chettri, 24 snem ka rta ba shong ba sah ha Dymmiew ha ka 6 tarik u Jylliew, 2023 hadien ba ngam jyllop ha ka wah Brahmaputra katba ki dang ïa leit jngi ka long kaei-kaei ka jingjia kaba sngewsih kthang ïa ka ïing ka sem bad ki paralok parajor jong kitei ar ngut ki samla.
Kum ban shu pynkynmaw, u Heibormi bad u Rahul ha ryngkat saw ngut ki paralok ki leit kai sha Assam ha ka 5 tarik u Jylliew, 2023. Ha ka step jong ka 6 tarik kitei 6 ngut ki la ïaleit kai sha kawei ka jaka ïa kaba la tip kyrteng kum ka Panikhaiti kaba don hajan ka Wah Brahmaputra ban ïa leit jngi shi paralok. Hynrei ha katei ka por u Rahul u la ngam jyllop bad na ka liang u Heibormi u la leit ban ïarap ïa la u jong u paralok bad ha katei ka por kitei ar ngut ki samla ki la ngam jyllop bad khlad noh na kane ka sla pyrthei.
Kumta na ka liang ki pulit jong ka Pragjyotishpur Police Station hadien ba ki la ïoh jingtip halor katei ka jingjia, ki la leit sha katei ka jaka bad da ka jingïarap jong ka kynhun State Disaster Response Force (SDRF) ki la ïoh ban sei noh ïa ka met jong u Heibormi ha ka janmiet jong ka 6 tarik u Jylliew. Katba ïa ka met jong u Rahul la lah ban sei ha ka sngi kaba bud kata ka 7 tarik.
Ïa ka met jong u Heibormi la wanrah ha ka 7 tarik u Jylliew ha nongbah Shillong hadien ba la pyndep ïa ka post mortem. Nangta la ïoh ban pyndep noh ïa ka jingleh ñiam leh burom ha ka 8 tarik u Jylliew ha u lum jingtep jong ka Balang Pentacostal Church of God.
