Nongstoiñ, Jylliew 08:
Ka shnong Tiniang ryngkat ka jingïatreilang bad ka KSU Tyniang Unit kumjuh bad ka Seng Samla Shnong Tiniang ki la hiar sha ki bynta jong ka Wah Riwiang ban jurip ïa ka wah hadien ba ki la ïoh ïa ka jingujor bad ka jingshah kren pynjah burom jong ka shnong namar ka jingbret pathar jong ki briew ïa ki bilor kyiad bad kiwei kiwei ki jaboh ha shi lynter jong katei ka wah kaba itynnad.
Ha katei ka jingjurip la lap shibun ki jaboh jabaiñ kiba la sdang ban dap ha ki rud jong katei ka wah khamtam eh ki bilor kyiad kiba la pynpait dusmon. La ong ruh ba kitei baroh ki dei ki jingleh pathar da ki rawon kiba ju leit khwai ha katei ka wah kiba ju mlien ban rah kyiad bad hadien ba ki la dep ban dih, ïa ki bilor kyiad la shu bret kat shaba lap.
Kumta na ka liang ka shnong Tiniang bad ka KSU Tyniang Unit ki la maham tyngeh ba nangne shakhmat yn ym shah shuh ïano ïano ruh kiba leit khwai ha katei ka wah ba kin rah ïa kino kino ki jingdih pynbuaid bad ban shong palat ïa ka por kaba la buh ryntih da ka shnong.
Ha katei ka sngi la ïadonlang u samla Philbak Marshillong Secretary Seng Samla Shnong Tiniang, u samla Rijit Roy Marshillong environment Secretary KSU Tiniang Unit bad u Bah Kyrshanbor Marshiangbai Sordar Shnong Tiniang bad kiwei kiwei.
