Shillong, Jylliew 08:
U Symbud Myntri Rangbah ka jylla, Bah Sniawbhalang Dhar bad uba khmih ruh ïa ka tnat Pynroi Sor u la pynpaw ba wat la ka Harijan Panchayat Committee (HPC) ka la mynjur ïa ka saiñdur ne ‘Blueprint’ jong ka Sorkar, hynrei ki kwah pat ban don katto katne ki jingpynkylla.
“Katkum ka khubor ba nga la ïoh la ong ba ka Harijan Panchayat Committee ka la pdiang ïa ka jingtyrwa bad ka Blueprint ba la pynkhreh da ka Sorkar Jylla, hynrei ki kwah pat ban don katto katne ki jingpynkylla ha kane ka Blueprint kumba la paw ha ka jubab kaba ki la phah sha ka ïingbishar,” la ong u Bah Sniawbhalang.
U la ong, “Hadien ba ki la pdiang ïa ka jingtyrwa, ki lah ban wan ïakynduh ïa ngi ka Sorkar na ka bynta ban ïakren bad kam don satia kano kano ka jingeh. Ka HPC ka lah ban wan ïakren bad ka sorkar ban pynpaw ïa kita ki bynta kiba ka kwah ban pynkylla bad lada ki long kiba biang ka sorkar kan ïaid shakhmat, hynrei lada shem ba ki long kiba eh, ka sorkar jylla kan ym pdiang.”
Shuh shuh u la ong, kat haduh mynta ym pat tip shai kiei kita ki mat kiba ka HPC ka kwah ban pynkylla namar kim pat wan ïakynduh ïa ka sorkar jylla bad kumta kin ap shwa ïa ka jingtyrwa kaba wan na ka HPC.
Lah ban kdew ba ha ka sngi Balang ka ïingbishar ka la shong tian bishar ha kaba ïadei bad ka jingthmu pynkynriah ïa kiba shong ba sah ha Them Metor sha kawei pat ka jaka. Ha kane ka jingtian bishar, la pyntip ruh ba ka Harijan Panchayat Committee (HPC) ka la mynjur ïa ka saiñdur ba la pynkhreh da ka Sorkar Jylla hynrei ka la buh ïa ki jingai jingmut ban pynkylla pat ïa katto katne ki bynta jong ka.
