Ngin dang ïa pynbeit ban pdiang ïa 2 ngut ki MDC ka Congress, ong u nongïalam ka NPP

Shuh shuh u la pyntip ba lada rung sa kine ar ngut ki MDC Congress sha ka NPP ka jingdon ki MDC kan poi sha ka 14 ngut.

Shillong, Jylliew 08:

Ki MDC kiba ha khmat jong ka National People’s Party (NPP) ki hap ban ïa shong pyrkhat na ka bynta ban pdiang noh ïa ki ar ngut ki MDC ka Congress ki ban sa pynïasoh noh shen sha ka NPP hadien ba ka jingïakren ka la biang nadong shadong ryngkat ki nongïalam ka NPP hapoh ka jylla.

Katkum ka khubor ba la ïoh lum la ïathuh ba kine ar ngut ki MDC ka Congress ki long u Bah Carnes Sohshang na Mawkyrwat bad u Bah Batskhem Ryntathiang na Mairang.

Haba ïakren bad uwei u MDC ka NPP, u la ïathuh ba ka jingïakren bad kine ar ngut ki MDC ka Congress ka la dep ïaid shakhmat bad kaba sah mynta ka long sa tang ban pdiang burom noh ïa ki na ka bynta ban pynkhlain ïa ka seng NPP ha kine ki konstitwensi na ka bynta ka ilekshon MDC ka ban long ha u 2014.

U la ïathuh ba hadien ba la rem ïa ka ilekshon MLA ha u bnai Rymphang, ka NPP ka la ïakynduh ïa baroh ki MDC kiba don ha ka liang pyrshah ba kin wan rung noh sha ka NPP. Hynrei, kito ki MDC kiba la long MLA kim lah shuh namar ki la shah teh ha ka aiñ kyntiap seng, hynrei sa tang u Bah PN Syiem uba dang skhem ha ka seng Congress.

Shuh shuh u la pyntip ba lada rung sa kine ar ngut ki MDC Congress sha ka NPP ka jingdon ki MDC kan poi sha ka 14 ngut.

“Lada ngi la don 14 ngut ki MDC ngin nym pynkhih shuh ïa ka shuki CEM u Bah Titos Chyne uba dei u MDC na UDP, hynrei ngin bteng beit ka jingïatreilang haduh ban da kut san snem kumba la dep ïakut” u la ong.

Haba pyrshang ban ïakren bad u nongïalam ka liang pyrshah ha ïingdorbar ka KHADC, u Bah PN Syiem u la pynpaw ba um don jingtip eiei shaphang kata ka jingthmu ban leit pynïasoh jong ar ngut ki MDC ka Congress sha ka NPP.

Kumta u la ong ba un sa peit ynda la dei kata ka por lada kita ki MDC ki la leit ban pynïasoh sha kawei pat ka seng.