Shillong, Jylliew:
U MLA barim ka Mawlai, Bah Process T Sawkmie bad ka HYC Mawïong Umjapung Unit ki la plie ïa ka jaka saitjaiñ na ka bynta ki nong Mawïong, khamtam kiba na ka dong Tariang A bad B.
Ha kane ka sngi la don ryngkat u Rangbah Shnong ka Mawïong Umjapung u Bah Herman Dohtdong, Bah Wanseng Jyrwa, Working President UDP Mawlai Circle, u Rangbah Dong Tariang A Bah Batskhem Makdoh, u President ka HYC Mawlai, Bah Donbok Kharlyngdoh, ki nongïalam ka HYC Mawïong Umjapung Unit, ki nongkitkam shnong, ki nongsaitjaiñ bad kiwei kiwei.
Haba ai jingkren ha kane ka sngi, u Bah Donbok u la ai khublei bad pynpaw ka jingsngewnguh ïa u Bah PT Sawkmie ba ha ka por ka jinglong MLA jong u, u la pynurlong ïa ki jingud jong ki, ha kaba u la pynïoh ïa ka kali na ka bynta ka HYC Mawlai Circle ba la pyllait ha Mawlai Nongkwar, u la shah shkor ban pynïoh ruh ïa ka jaka saitjaiñ ha kawei na ka dong ha Mawlai Umjaiur bad mynta sa hangne ha Mawïong Umjapung.
Katba na ka liang u Bah Process u la pynpaw ïa ka jingsngewkmen ba ha i bor barit u la ïoh ban mang ïa kane ka jaka saitjaiñ ha Mawïong Umjapung na ka MLA skhim jong u bad kyrmen ba kane ka jaka kan long ka ban pynmyntoi na ka bynta ki nongsaitjaiñ.
