Nongstoiñ, Jylliew 08:
U District Magistrate ka West Khasi Hills District, Bah Garod LSN Dykes, IAS, u la pynjari da ka kyndon 144 CrPC kaba khang bad mana pyrshah ïa ki briew lane kynhun briew ban kem bad tong dohkha da kaba pyndonkam da ki kynja dawai bad ban pynbthei bom ha shi lynter jong ka wah Wahblei bad wah Khusang, kiba hap hapoh ka Mawshynrut Block, West Khasi Hills District.
Ha ka kyrwoh khubor ba la phah, la ong ba kane ka jingleh ka wanrah ïa ka jingpynjot ïa ki kynja ba im hapoh ki um, ki wah bad ka pynsniew ïa ki sawdong sawkun jong kine ki wah.
Kumta lada lap ïa kiba ïaleh pyrshah yn pynshitom katkum ki kyndon jong ka aiñ. Kane ka jingmana kan treikam noh mardor naduh bala pynmih ïa kane ka hukum.
Ha kawei pat ka khubor, la ong ba ka jingpynrung kyrteng da ka online na ka bynta ban jied lane ban mynjur ïa ki kyrteng jong kito ki ban ïoh pdiang ïa ka khusnam Padma Awards-2024, la dep ban sdang naduh ka 1 tarik u Jymmang 2023 lyngba ka portal jong ka Rashtriya Puraskar Portal.
Ka kyrwoh khubor ka ong ba ka tarik kaba khatduh ban pdiang ïa ki kyrteng na ka bynta kane ka khusnam kan long ha ka 15 tarik u Nailur 2023 bad yn pdiang beit tang kiba thep kyrteng da ka online.
Shuh shuh ïa ki jingtip kiba bniah halor kane, yn ïoh na ka ophis jong u Deputy Commissioner ka West Khasi Hills District lane phah da ka Email: [email protected].
