Baghmara, Jylliew 08:
Arngut ki shipai Border Guards Bangladesh (BGB) ki la rung sha u pud u sam jong ka Ri India ha ka shnong Rongara Imbloka (Waek) kaba don ha South Garo Hills bad ki la pynibor bad ki trai shnong ha shwa ba ki trai shnong kin beh ïa ki.
Kane ka la jia ha ka Sngi Balang ha ka por 3 baje nohphai sngi. Arngut ki shipai BGB ki la wan rung sha katei ka shnong da ka jingthmu ban wad ïa ki mar khaïi tuh bad ki la leit khynra sha ki ïing ki sem khlem da ïoh jingbit.
Haba ki la don ki nongshong shnong kiba la pynpaw ïa ka jingpyrshah halor katei ka jingleh jong ki, la kynnoh ba kita ki shipai BGB ki la sei da ki tiar siat jong ki bad byrngem artad.
Kham hadien, ki nongshong shnong ki la ïalum lang bad ki la sdang ban kylli pyrthew bad ka la don ruh ka jingïania kaba jur. Ha kajuh ka por, ka ‘Video’ halor kane ka la saphriang kylleng bad la paw ba kita ki shipai BGB ki la leit phai noh sha la ka Ri hadien ba la mih ka jingïania.
Hadien katei ka jingjia, ki nongshong shnong ki la pyntip sha ki pulit bad ki BSF bad hadien kata, ki BSF kiba don ha South Garo Hills ki la leh ïa kaba donkam.
Ha ka jingïakynduh hapdeng ki BSF bad BGB ha ka jingïalang, ki BSF ki la ai jingtip shaphang katei ka jingwan jong arngut ki shipai BGB. Ïa kane ka jingjia la lah ban pynbeit hadien ba ki heh ka BGB ki la ai ïa ka jingkular ba kin sa leh da kaba tyngeh pyrshah ïa kitei ki arngut ki shipai BGB bad ban pynthikna kiba kum kitei ki jingjia kim dei shuh ban jia hadien habud.
Na ka liang u SP ka South Garo Hills, u Abraham T Sangma, u la ïathuh ba la phah ïa ki pulit sha katei ka jaka ban pynthikna ba kan ym mih kano-kano ka jingjia.
