Nongpoh, Jylliew 08:
Ha kawei ka jingjia jaba la jia ha ka sngi Palei ha Ri Bhoi, la ïathuh ba lai ngut ki nongshong shnong jong ka thaiñ Western Ri Bhoi ki la ngat ha ka jingshah pynshitom da kaba shah pynkit tin halor ka jingsuba bad kynnoh ba ki la donkti ban leh sniew lane ai ksuid ïa kawei ka longïing ha ka shnong Umrit.
Kumba la ïoh jingtip, napdeng kitei ki lai ngut kiba la shah ngat ha ka jingshah pynkit tin, ar ngut ki dei ki longkmie na ka shnong Umrit kiba la shah kynnoh donkti ban phah ai ksuid, katba uwei pat u rangbah na ka shnong Umkadhor u dei uba la shah kynnoh men-ai-ksuid.
Haba pyrshang wad jingtip halor kane ka jingjia na u Rangbah Shnong ka Umrit, u Bah Epnas Thangkhiew, la ïathuh ba kane ka kam baroh ka dei kaba la sdang na ka kam tuh dieng ha kaba la kynnoh ba kitei ar ngut ki longkmie, ki la leit ban tuh dieng na kawei ka khlaw kaba long trai da ka Kong Shuti Nongphlang.
La ïathuh ruh ba hadien ka jingshah kynnoh tuh dieng, ka la mih ka jingkynad kaba jur hapdeng ka trai lem bad kitei ar ngut ki longkmie tad haduh ba u pud ba kitei ar ngut ki longkmie, la kynnoh ba ki la phah ban leh sniew lane phah ban ai ksuid ha utei u rangbah na shnong Umkadhor pyrshah ïa katei ka longkmie kaba dei trai jong katei ka khlaw da kaba wan tep pylleng hapoh ki rud jong ka.
Shuh shuh u la ïathuh ruh ba halor kane ka jingjia, na ka liang ki bor shnong lem bad ki paidbah ki la leh ïa kane ka kam ban pyndeng tin ïa kitei ki lai ngut, ka dei hadien ba kitei ki lai ngut ki la phla shisha dalade ba ki la leh shisha ïa katei ka kam sniew ban wan tep pylleng ha ki ar jaka, kata harud jong ka ïing Dorbar Shnong bad ka ïing jong katei ka trai khlaw.
La ïathuh ruh ba kitei ki lai ngut ki la phla ruh ba ki la thmu ruh ban leit tep pylleng wat ha ka rud ïing jong u Rangbah Shnong, hynrei la ïathuh ba ka pylleng ka la pait noh ha shwa ba kin leit tep. Ha katei ka sngi la lap tang ïa kiba ki la tep harud jong ki bynta ka ïing Dorbar, katba harud jong katei ka trai khlaw ym shym la lap satia.
Na ka liang u Rangbah Shnong, u Bah Epnas Thangkhiew u la ïathuh ruh ba ka jingpyndeng tin ïa kitei ki lai ngut kam dei satia kaba ki shim ïa ka aiñ ha ka kti, hynrei ka dei kum ka jingpynshitom ban pynehrngiew ïa ka shnong bad katei ka longïing kaba la shah leh sniew naba kam don satia kano kano ka jingktah kti ne pynmynsaw ïa kitei kiba la shah kynnoh nongaiksuid.
Ha kajuh ka por, na ka liang u Rangbah Shnong u la ong ruh ba lyngba kane ka jingpynshitom ïa kitei ki lai ngut kan long kum ka jingmaham ruh ba nangne shakhmat kum kine ki jingjia kim dei shuh ban wan jia hapoh ka shnong ka thaw hadien habud, naba ka ktah ïa ka bha ka miat bad ka shongsuk shongsaiñ.
