Shillong, Naiwieng 20
Ka Sorkar Jylla ka la pynshai ïa ka jingkam jong u Myntri Rangbah ka Jylla u Conrad K. Sangma kaba u la ong ba ki don ki nonghikai kolej ‘Grant-in-Aid’ ba la Rangbah kiba ïoh tulop T.4.5 lak ha ka shi bnai, la pynpaw ba u nonghikai u ba ïoh tulop heh duh u ïoh T.3,88,696 ha ka shibnai.
Kane ka jingpynshai na ka ophis Joint Director jong ka Higher and Technical Education ka la mih hadien ba ka Meghalaya College Teachers’ Association (MCTA) ka la pan na ka Sorkar ban pynshisha ïa ka jingkren jong u Myntri Rangbah ka Jylla ha ka 19 tarik Naiwieng ha ki kot khubor kaba u la kynnoh ba ki don ki nonghikai kolej Deficit kiba ïoh tulop kham heh ban ïa u Lat ka Jylla.
Ka Sorkar Meghalaya ha ka 20 tarik u Naiwieng, 2026, ka la pyllait ïa ki jingtip ba bniah jong ki 10 tylli ki jingsei tulop bnai ba heh tam ba sei da ki nonghikai kiba hikai ha ki ‘Grant-in-Aid’ College ha kylleng ka Jylla, da kaba kdew ba ka jingsynñiang pisa ka Sorkar ka dei ban kyntiew ïa ka pule puthi ha ka Jylla.
Katkum ka kyrwoh ba la pyllait da ka Directorate of Higher and Technical Education, ka jingsei tulop bnai ba heh tam napdeng ki nonghikai College ka dei T.3,88,696 tyngka kata da u/ka Associate Professor ha ka Department of History ha Lady Keane College, Shillong bad ha ka shi snem ka poi T.46,64,352.
Ka jingsei tulop bnai kaba heh man la u bnai ha ka kyrdan ba ar pat ka dei T.3,66,528 da u/ka Associate Professor ha ka Department of English, ba dei na Lady Keane College.
Ki Associate Professor ha ka Department of Physics ha Synod College, Department of Geography ha Union Christian College bad Department of Physics ha Sankardev College ki sei tulop mar T.3,64,468 tyngka man la u bnai.
Kane ka thup ba la pynlait ka pyni ba u/ka Associate Professor ha Department of Garo ha Sankardev College, ka tulop bnai ka long T.3,57,074, katba ki Associate Professor ha ka Department Khasi ha Lady Keane College bad Department of Education ha Shillong College ki sei mar T.3,55,933 shi bnai.
Kiwei-kiwei pat ki kynthup ki Associate Professor na Lady Keane College, Sankardev College, Synod College, St. Mary’s College bad Shillong College, ki sei ka jingïoh tulop kaba long hapdeng T.3,43,664 bad T. 3,55,873 tyngka man u bnai.
Ka Directorate ka pynshai ba ym shym la sei ïa ki kyrteng jong ki Associate Professor khnang ban ym don jingktah shimet ïa ki bad ka kdew ruh ba ka jingïarap pisa ka Sorkar sha ki ‘Grant-in-Aid’ College kata da ka tulop ka long ban pynneh ïa ki nonghikai kiba tbit ban kyntiew ïa ka pule puthi.
Halor ka jingkren u Myntri Rangbah ka Jylla, u Conrad K. Sangma halor ka jingsei tulop ba heh tam kaba long T.4,50,000 shi bnai, ka Directorate ka la ong ba katei ka jingkheiñ ka dei halor ka Departmental Presentation ha ka jingïalang Kynhun Myntri ha u Jylliew 2026.
Katkum katei ka Presentation, ka jingsiew tulop bnai ba heh duh napdeng ki nonghikai Deficit College ka dei T.4,42,364 ba kynthup lang kiwei-kiwei ki jingsiew nalor ka jingsiew kaba shi bnai.
U Myntri Rangbah u kdew sha ka dor kaba ïajan bad ka T.4,50,000 shi bnai, ong ka kyrwoh kaba la bynrap ba u/ka nonghikai ba ïoh katei ka tulop kim don shuh ha kam bad pynthikna biang ruh ba ka jingsiew bnai ba heh duh mynta ka dei T.3,88,696.