Dawa ka HBDRF na ka Sorkar ban kynthup mardor ïa baroh ki shnong ha Block-1

Shillong, Naiwieng 20 Ka Hynñiewtrep Border Dispute Redressal Forum (HBDRF) ha ka 20 tarik u Naiwieng 2026, ka la leit ban buh da ka jingthoh sha u Chief Secretary ka Sorkar, u Dr.Shakil P.Ahammed, u...

Shillong, Naiwieng 20

Ka Hynñiewtrep Border Dispute Redressal Forum (HBDRF) ha ka 20 tarik u Naiwieng 2026, ka la leit ban buh da ka jingthoh sha u Chief Secretary ka Sorkar, u Dr.Shakil P.Ahammed, u Myntri Rangbah ka Jylla u Conrad K. Sangma bad sha baroh 36 ngut ki MLA ka Ri Khasi-Jaiñtia, ban dawa ithuh bad kynthup noh mardor ïa baroh ki shnong Khasi-Pnar kiba don ha Block-I, khamtam ka Labang, Nangphyllut, Dolloiship bad Pangam Raliang, hapoh ka Jylla Meghalaya.

Haba kren sha ki lad pathai khubor u Bah Chandame Sungoh, Chair -man ka HBDRF u la pynpaw ka jingsngewsih ha kaba ïadei bad ka histori bad ha ka jinglong jong ki shnong ha katei ka thaiñ, kaba la don da ki 6 ne 7 tylli ki snem hynrei haduh mynta ym lah ban ïohi ïa ka jingkylla.

“Ngim lah ban ong ba ka Sorkar kam leh eiei, tharai ka Sorkar ka la leh bad pyrshang hynrei haduh mynta pat ka dang sahteng. Ngi kiba mad ïa kata ka jingeh ka long ka jingkordit ïa ki paid nongshong shnong, bad ka jingleit buh da ka jingthoh sha baroh ki MLA, ngi don ka jingkyrmen ba kin don kajuh ka jingmut ban ithuh noh ïa ki shnong Pnar baroh kiba don hapoh Block-1,” la ong u Bah Chandame. Shuh shuh u la ong ba kum ka Schedule State kumba long hapoh ka Meghalaya, ha kaba nyngkong ka dei ka District Council ban ithuh ïa kitei ki shnong bad ban ai sanad ïa ki Rangbah Shnong, bad ka Sorkar Jylla ka dei ban ithuh ïa kita ki shnong, khnang ban don ki Village Court, ki Konstitwensi ba ki hap, ki PHC, ki CHC, ki Polling Station bad kiwei-kiwei de. U Bah Chandame u la ong ruh ba ïa ka Block-1 naduh u snem 2023, ha kaba ka Jaiñtia Hills Autonomous District Council (JHADC) ka la pynkha biang ïa ka Elaka Labang Nangphyllut ha ka 08 tarik Naiwieng 2023 bad ka la thung ïa u Bah Prolin Samayang kum u Acting Dolloi, ha kaba ka Council ka la ai ruh ïa ka Sanad ne Certificate na ka bynta u Acting Dolloi bad ki Rangbah Chnong.

Namarkata, “Ka jingai ïa ki sanad da ka District Council kam don jingmut katkum ka aiñ jong ka JHADC, kaba la tip kum ka Jaiñtia Hills Autonomous District Council  (Establishment of Elaka and Village and Election Appointment, Power, Function, and Jurisdiction of Dolloi/Sirdar and Waheh Chnong Act 2015), hapoh ka Sixth Schedule jong ka Constitution India,” u la ong.

Shuh shuh u la kdew ba ïa ka jingsuk ban wanrah ka jingshong suk shongsaiñ, ym dei ban ïakren ha ka por ba don ka jingjia ïakajia, ïa ka shongsuk shongsaiñ dei ban ïakren ha ka por ba dang long jai jai.

“Ka Sorkar ka khohreh ban pynbeit pud tang ha ka por ba jia ïa kulmar bad kynad, namar ha ka por ba don ka jingkynad, lah ban wanrah ïa ka shongsuk shongsaiñ, hynrei da kut ka jingjia ïakajia ngim ïa ban shuh,” la bynrap u Bah Chandame.

Kumta, u Bah Chandame Sungoh u la kyrpad na ka Sorkar, ba kan ithuh noh mardor ïa kine ki shnong kiba don ha katei ka thaiñ ban ïoh aplai ïa ki kot ba donkam kum ki Birth Certificate, Scheduled Tribe Certificate, EPIC (Election Photo Identity Card) bad Aadhaar Card.