Shillong, Naiwieng 20
Ki Khadhynriew tylli ki Dorbar Shnong kiba ha Shillong kim pat lah ban pyntreikam katkum ki kyndon ba la bsuh ha ka aiñ Meghalaya Residents Safety and Security Act, 2016 (MRSSA) namar donkam ïa ki computer ban pynrung kyrteng katkum kane ka juk ba mynta.
Kane ka jingbym pat lah ki Dorbar Shnong ban pyntreikam ka paw hadien ba ka FKJGP Sengkmie mynta ka sngi Balang ka la leit ban ïakynduh ïa u Deputy Commissioner ka East Khasi Hills u Abhilash Baranwal ban pan jingshai halor ka Task Force Committee kaba hap ha MRSSA haba ïadei kumno ki Dorbar Shnong ki pyntreikam ïa ki kyndon ban pynrung kyrteng ïa ki nongshong wai.
Haba ïakren bad ki nongthoh khubor, u Bah Dundee Khongsit u President FKJGP u la ong ha ka jingïakynduh bad u DC u la ïathuh ki don kumba 16 tylli ki Dorbar shnong ki la wan ha ka jingïalang pyrkhat halor kane bad na ka liang ka ophis u DC ki la phah ïa ki kumno ki dei ban leh hynrei haduh mynta kam pat don ka jingpyntreikam na kine ki Dorbar Shnong.
Na ka liang ka seng ka ai jingmut ïa u DC ba un kyntu ïa ki Dorbar Shnong ba ki dei ban leh ïa kane ka jingbthah.
Haba ïadei ka jingpynsngew ki Dorbar Shnong ba ki eh ban pyntreikam ïa ka MRSSA hapoh shnong namar ki donkam ïa ki kor treikam katkum ka juk, kumta ka seng ka la kyrpad ïa ki Dorbar Shnong ba kin pyndonkam shwa ban pynrung kyrteng katkum ka juk ba mynshwa na ka bynta ban buh kyrteng ïa ki nongshong wai khamtam ki bar jylla.
Shuh shuh u la pynkynmaw ba ka seng ka ju ïatyngkhuh haba pynrung kyrteng ha ka electoral roll namar kito ki bar jylla ki ïoh dur thep vote tang namar ba ki la lah ban plie account, kumta donkam ba ka TFC kan bthah ïa ki nongshong wai bar jylla ba ki dei ban pynrung kyrteng.