Ban jur u Myntri Rangbah halor ki kam jngoh kai pyrthei ba don jingkitkhlieh

Shillong, Naiwieng 20 U Myntri Rangbah ka Jylla, u Conrad K. Sangma ha ka Sngi Thohdieng u la ong ba ka Meghalaya kam kwah ban shu long tang kum kawei pat ka jaka jngohkai pyrthei,...

Shillong, Naiwieng 20

U Myntri Rangbah ka Jylla, u Conrad K. Sangma ha ka Sngi Thohdieng u la ong ba ka Meghalaya kam kwah ban shu long tang kum kawei pat ka jaka jngohkai pyrthei, hynrei kum ka nuksa jong ki kam jngohkai pyrthei ba don ka jingkitkhlieh na ka bynta ka pyrthei.

U Conrad u la ong ïa kane haba ai jingkren ha ka kylla kaba saw jong ka ‘Outlook Indian Responsible Tourism Summit & Awards 2026 – Meghalaya Chapter’ ha Shillong.

Haba pdiang sngewbha ïa ki ‘Delegate’, ki nongkren, ki nongïashim bynta bad kiwei-kiwei na kylleng ka ri, u Myntri Rangbah u la ong ba ka Sorkar ka la ithuh ïa ka kam jngohkai pyrthei kum ka tnad ba kongsan, kaba don ka lad ban kiew shaphrang bad ban ai ka lad kamai-kajih ïa ki paidbah.

“Ki nongjngohkai pyrthei ki wan ban mad ïa ka kolshor, ka riti-dustur, ki jaka baitynnad, ka rwai ka siaw – ka put ka tem, ki jingbam bad baroh kaba ka Meghalaya ka tyrwa,” ong u Conrad. U la pynpaw ruh ba ka kam jngohkai pyrthei ka dei ka lad kamai kaba kongsan ha ka ïoh ka kot na ka bynta ka Meghalaya bad ong ba ka rukom treikam jong ka Jylla ka buh ïa ki paidbah, ki nongseng kam seng jam bad ki karkhana trai-ri hapdeng jong kane ka jingroi, ha ryngkat ka jingbei tyngka ha ki jingtei, ki lad kamai bad ka jingpynneh-pynsah ïa ka kolshor, ka jinglong kyrpang bad ka pateng mariang.

Haba batai ïa ka buit treikam, u la ong ba kane ka long ban seng ïa ka nam ba ïadei bad ka kam jngohkai pyrthei.

“Ngin ym long tang ka jaka jong ki kam jngohkai pyrthei – ngin long ka nuksa jong ki kam jngohkai pyrthei ba don ka jingkitkhlieh na ka bynta ka pyrthei bad ban thaw la ka kyrteng ka nam – ka ‘Meghalaya Tourism’,” u la ong bad bynrap ba kane ka jingkitkhlieh ka sdang nalade – ym tang ki nongwan jngohkai pyrthei, hynrei na uwei-pa-uwei u nongshim bynta ha ka kam jngohkai pyrthei.

Haba pynpaw ïa ka jingkmen kaba khraw halor ka kyrdan jong ka Meghalaya haba phai sha ka ‘BBC’s 20 Places to Visit in 2027’, u Myntri Rangbah u la ong ba ka jingithuh ba la ïoh ka dei ka risol jong ki 8 snem (ba la dep) jong ka jingtrei shitom jong baroh ki nongshim bynta bad ym tang namar kawei ka jingleh ne jingjia.

“Mynta la buh ïa ka kyrdan kaba pher bad la rah ruh ïa ka nam,” u la ong da kaba bynrap ba kane ka jingithuh ka pynpaw ïa ka jingitynnad mariang, ka kolshor bad ka pateng jong ka Jylla, lem bad ka rukom treikam ba la ïalam da ki paidbah haba ïadei bad ki kam jngohkai pyrthei. U la pynpaw ruh ïa ki prokram, ki polisi, ki skhim, ki projek pynroi jong ka Sorkar, ka jingïatreilang bad ki kompeni bapher-bapher lem bad ki nongshong shnong ban pynïar ïa ka kam jngohkai pyrthei kumjuh ban khring ïa ki nongjngohkai pyrthei napoh ka ri bad nabar ri kumjuh.

Haba pynkut, u Myntri Rangbah u la pynpaw ba ka kam kaba hakhmat eh ka long ban pynkylla ïa ki buit kiba mih na kane ka ‘Summit’ sha ka jingtreikam, da kaba bynrap ba ïa ka jingjop ha ka kam jngohkai pyrthei la thew ym tang da ka jingbun ha ka jingwan ki nongwan jngohkai bad ka jingbei tyngka, hynrei da ka jingïashim bynta jong ki nongshong shnong, ka jingmyntoi ha ka liang ka ïoh ka kot kaba ïabiang lang, ka jingpynneh-pynsah ïa ka kolshor bad ka jingïada ïa ka mei-mariang.

Kane ka ‘Summit’, kaba la pynlong da ka tnad jngohkai pyrthei ha ryngkat ka jingïatreilang bad ka ‘Outlook and Outlook Traveller’, ka lum lang ïa ki Sorkar, ki shnong ki thaw, ki kam khaïi, ki nongsumar mariang bad kito kiba don bynta ha ki kam jngohkai pyrthei halor ka jingthmu ba ïasam lang – ban pyntikna ba ka kam jngohkai pyrthei ka thaw ïa ki lad ka kabu ha ka ïoh ka kot, ha kajuh ka por haba ïada ïa ki briew, ka kolshor bad ka mei-mariang.