Nongstoiñ, Jylliew:
Ka Khasi Students’ Union, West Khasi Hills District ka la phah da ka dorkhas sha ka Sub-Divisional School Education Officer (SDSEO) ka Nongstoiñ ban phah khang shwa ïa baroh ki skul na ka ban ïeng laiñ ïa ki khynnah shwa ban long skul ne ka school Assembly khnang ban ïada na kino kino ki jingshah ktah ha ki bor mariang.
Katei ka jingphah dorkhas jong ka KSU ka dei namar ka jingkiew kynsan ka jingshit kyrang jong ka suiñ bneng ha kine ki sngi kaba lah ruh ban ktah ïa ka koit ka khiah jong ki paidbah.
U President ka KSU, West Khasi Hills u samla Johnfisher Nongsiang, u la ong ba ka seng ka la ïoh bun ki jingujor na ki kmie ki kpa kiba sngew khuslai na ka bynta ki jong ki khun namar ka jinglong shit kyrang palat jong ka suiñ bneng kaba la lam ruh sha ka jingïoh pang.
U samla John u la ong ruh ba ha kine ki sngi ki la don ruh ki khynnah skul kiba la kyllon katba dang ïeng Assembly bad ki don ruh kiba la ïoh pang namar ka jingshit palat jong ka suiñ bneng.
Kumta ka KSU ka kyntu ïa ka SDSEO ba kan shimkhia ban phah sangeh shwa ïa ka jingïeng Assembly ha ki skul namar kane ka lah ban ktah ïa ka koit ka khiah jong ki khynnah skul.
