Jowai, Jylliew 08:
U Deputy Commissioner uba dei ruh u Chairman ka District Rural Development Agency jong ka West Jaiñtia Hills District, u la pyntip sha baroh ki nongshong shnong jong ka District ba ka jingpynrung kyrteng Aadhaar (Aadhaar Enrolment) kyrpang na ka bynta ki khunlung ba dang 0-6 snem, ki samla lud, ki longkmie ba armet bad ki longkmie ba dang ai buiñ kiba ïoh jingïarap na ka Scheme ICDS ka la sdang naduh ka 31.5.2023.
Kiba donkam ki lah ban leit mih sha ka ophis u Deputy Commissioner, Block Development Officer ban pynrung kyrteng.
Kumjuh ruh, lah ban phone ne kylli ïa ki Waheh Shnong bad nongtrei Aganwadi ïa ka jingwan jong ki nongpynrung kyrteng ha ki shnong ki thaw.
U Deputy Commissioner u la kyntu ïa baroh ki paidbah ki bym pat pynrung kyrteng ban shim ïa kane ka lad ban pynrung kyrteng ïa lade.
Kumjuh ruh na ka liang u Deputy Commissioner ka East Jaiñtia Hills District u la pyntip sha ki paidbah nongshong shnong ka East Jaiñtia Hills District ba ka Sorkar India ka la ai por ïa ka Sorkar Jylla ban pynbiang ryntih noh mar-mar ïa ki Aadhaar jong ki khyllung khynnah kiba dei ki nongïoh myntoi ïa ka skhim Supplementary Nutritional Program (Skhim ai bam ïa ki khynnah) kaba la long ka jingkyrkhu ïa ki khynnah rit kiba la ïoh ïa ki jingbam kiba tei ïa ka met ka phad jong ki lyngba katei ka skhim hynrei ki ban hap duh noh ïa kita ki jingmyntoi lada kim don ïa ka Aadhaar Card.
Kumta, la wer ïa ki kmie ki kpa jong ki hep kiba rit bad ruh ïa kiba la san ba kin shimkhia ban pynkhreh ïa ki khun jong ki ban leit mih sha ki jaka ba la buh kyrpang na ka bynta ban shna ïa ki Aadhaar Card bad lada ki khun jong ki lane ma ki kim don ïa ka Birth Certificate, ki briew kiba la buh da ka sorkar kin sa ïarap ban batai kumno ban leh, khnang ban pynsuk ïa ki paidbah.
Ki nongshna Aadhaar ba la pynbeit na ka ophis jong u Deputy Commissioner kin sa wan sha ki shnong jong ki katkum ki prokram ba la shna kyrpang bad yn sa shna Aadhaar Card ïa ki bad ki khun rit jong ki.
Shuh Shuh, lah ruh ban kdew hangne ba ka Sorkar India kan sa pynsangeh noh ïa ka pisa jong kito ki nongbylla shispah sngi (Job Card Holder), Smart Card (MHIS) bad kiwei kiwei ruh ki skhim jong ka Sorkar India, lada kim don ïa ka Aadhaar Card lane khlem register bad ka Aadhaar Card.
Namar kata, la kyrpad ïa baroh ki nongshong shnong jong ka district ba kin shimkhia ïa kane ka jingpyntip ba donkam khnang ba kan ym long ka jingduh jingmyntoi kaba khraw.
