Tura, Jylliew 09:
Uwei u briew ba la tip kyrteng kum u Ramjan Ali, u la shah rai pynrem ha u Special Judge ka ïingbishar POCSO ha West Garo Hills, bad ka jingpynsaja ïa u ka long ba un hap ban shong patok na ka bynta 20 snem.
Katkum ka khubor ba la ïoh na ki pulit ka West Garo Hills, la ong ba u Ramjan Ali u la shah kem hadien ba la kynnoh ba u la leh be-ijot ïa kawei ka khynnah rit ha ka 19 tarik Lber, 2014 ha ka ïing sah jong kata ka khynnah.
Na ka liang ki pulit ki la pynrung da ka jingujor ha thanat Tura bad ïa ka jingtohkit la leh da ka Usha Singha. Hadien ka jingtohkit, la mudui ïa u Ali sha ïingbishar ha ka 27 tarik Jylliew, 2014, bad nangta, la sdang sa ka jingtian bishar.
Ha ka jingbishar, u nongbishar (Special Judge POCSO), West Garo Hills, u la shem ba u Ali u la donkti ha katei ka kam bymman, bad la pynrem ïa u hapoh ka kyndon 376(2)(i) IPC bad 3(a)(b)/4/5(n)/6 POCSO Act.
Hadien ka jingshah rai pynrem, ka ïingbishar ka la pynbna ba u Ali un hap shong patok na ka bynta 20 snem bad un hap ruh ban siew T. 20,000 kum ka kuna. Lada um lah ban siew ïa ka kuna, un hap ban bteng shong patok sa shi snem.
